ଜାଗର
ଜାଗର
ଫାଲ୍ଗୁନ ମାସର କୃଷ୍ଣ ଚତୁର୍ଦ୍ଦଶୀ
ଆସ ରହି ଉଜାଗର ।
ଜାଳିବା ଜାଗର ପ୍ରସନ୍ନ ହୋଇବେ
ପ୍ରଭୁ ଆଶୁତୋଷ ହର ।
ପ୍ରଭାତୁ ସ୍ନାନାଦି ନିତ୍ୟକର୍ମ ସାରି
ସଂକଳ୍ପ କରିବା ମନେ ।
ଆଶୁତୋଷ ହର ଜାଳିବି ଜାଗର
ଆଜି ନିଶି ଶୁଭ ଦିନେ ।
ଅହୋରାତ୍ର ଆଜି ଉପବାସ ରହି
ରହିବି ତୁମ ସେବାରେ ।
ଓଁ ନମଃ ଶିବାୟ , ଓଁ , ବଂ ବଂ
ଜପୁଥିବି ଆନନ୍ଦରେ ।
ସଞ୍ଜ ନଇଁଗଲେ ପୁନଃ ସ୍ନାନ ସାରି
ଶିବ ମନ୍ଦିରକୁ ଯିବା ।
ପଞ୍ଚ , ଦଶ , ଷୋଡଶ ଅଥବା
ରାଜୋପଚାରେ ପୂଜା କରିବା।
ଆଶୁତୋଷ ହର ଦେବ ମହେଶ୍ବର
ଗିରିଜାଙ୍କ ପ୍ରାଣଧନ ।
ଜଳ ବେଲପତ୍ର ଦୁର୍ଦ୍ଦୁରା ଅରଖ
ଫୁଲେ ହୁଅନ୍ତି ପ୍ରସନ୍ନ ।
ଚାରି ପ୍ରହରର ପୂଜା ସମାପନ
କରି ରହି ଉଜାଗର ।
ସନ୍ଧ୍ୟା ପ୍ରହରରୁ ସାରା ରାତି ଆମେ
ଜାଳିବା ବସି ଜାଗର ।
ନିଶୀଥ କାଳରେ ମହାମୃତ୍ୟୁଞ୍ଜୟ
ମନ୍ତ୍ରକୁ ଜପ କରିବା ।
ପ୍ରସନ୍ନ ହୋଇବେ ଶାମ୍ବ ସଦାଶିବ
ପ୍ରସନ୍ନ ହୋଇବେ ଶିବା ।
ଧ୍ୟାନ ସ୍ତବ ସ୍ତୁତି ଶିବଙ୍କର ଆମେ
ପଢିବା ମନ ଲଗାଇ ।
ଆଶୁତୋଷ ଶିବ ପ୍ରସନ୍ନ ହୋଇବେ
ସନ୍ଦେହ ଟିକିଏ ନାହିଁ ।
ମହାଦୀପ ଶିବ ମନ୍ଦିରେ ଉଠିବ
ନିଶ୍ଚେ କରିବା ଦର୍ଶନ ।
ପାରଣା କରିବା ସେ ଚତୁର୍ଦ୍ଦଶୀରେ
ହେବ ପାତକ ମୋଚନ ।
ଆଶୁତୋଷ ହର ହର ସଂସାରର
ଦୁଃଖ ଅଜ ମହେଶ୍ବର ।
ଢାଳୁଛୁ ପ୍ରଣତି ଶ୍ରୀପାଦେ ତୁମର
ସଂସାରୁ ଉଦ୍ଧାର କର ।