ଇନ୍ଦ୍ରଧନୁ
ଇନ୍ଦ୍ରଧନୁ
ଟୁପୁରୁ ଟୁପୁରୁ ମେଘ ବରଷିଲା
କଳା ପରଦାକୁ ଟାଣି
ଗୋଟିଏ ଛତାର ଆଢୁଆଳେଦୁହେଁ
ଚାଲୁଥିଲେ ରାଜା ରାଣୀ ||
ସାରୁ ବୁଦା ମୂଳେ ବେଙ୍ଗ ଓ ବେଙ୍ଗୁଲୀ
ଆନନ୍ଦେ ଗାଆଁନ୍ତି ଗୀତ
ଚାଲ ଚାଲ ଆମେ ରାଜାରାଣୀ ସଙ୍ଗେ
ଯାଇ ବସିବା ସଙ୍ଗାତ||
ଛାଡି ଗଲା ମେଘ ଦିଶିଲା ସୂରୁଯ
ବୁଣିଦେଲା ଜ୍ୟୋତି ଧାରା
ଜଳକଣା ଦେଇ ଆଲୋକର ରଶ୍ମୀ
ପ୍ରତିଶ୍ରୁତ ହେଲା ପୂରା ||
ପ୍ରତିସୃତ ରଶ୍ମୀ ନଭ ପରଦାରେ
ବର୍ଣ୍ଣାଳୀଟେ ଦେଲା ଆଙ୍କି
ସାତ ରଙ୍ଗ ସେଠି ସୁନ୍ଦର ଦିଶିଲା
ଇନ୍ଦ୍ର ଧନୁ ନାମ ଲେଖି||
ସାତ ରଙ୍ଗେ ଭରା ଧନୁ ସମ ଦିଶେ
ବୋଲି ନାମ ଇନ୍ଦ୍ରଧନୁ
ଦେଖିଦେଲେ ଆଖି ଲାଖି ରହିଯାଏ
ଭୁଲିହୁଏ ନାହିଁ ମନୁ ||
ବାଇଗଣୀ ସଙ୍ଗେ ଘନନୀଳ ନୀଳ
ସବୁଜ ଓ ହଳଦିଆ
ନାରଙ୍ଗୀ ସାଙ୍ଗକୁ ଲାଲ ରଙ୍ଗ ମିଶି
ସାତରଙ୍ଗ ମନଲୋଭା||
କାହା ଧନୁ ନୁହେଁ ଆଲୋକ ବର୍ଣ୍ଣାଳୀ
ଆକାଶର ପରଦାରେ
ଜଳ କଣା ଏଠି ପ୍ରିଜିମ୍ ସଦୃଶ
ବର୍ଣ୍ଣାଳୀ ସୃଜନ କରେ ||
ପ୍ରତିସରଣାଙ୍କ ବିଭିନ୍ନ ରଙ୍ଗର
ଆଲୋକର ରଶ୍ମୀ ପାଇଁ
ଭିନ୍ନ ଭିନ୍ନ ଅଟେ ତାଙ୍କ ଗତି ପଥ
ଭିନ୍ନ ପରିବେଗ ପାଇଁ ||
ଗୋଟିଏ ମାଧ୍ୟମୁ ଅନ୍ୟ ମାଧ୍ୟମକୁ
ରଶ୍ମୀଟିଏ ଏକ ରଙ୍ଗର
ପ୍ରବେଶ ମାତ୍ରକେ ଗତି ପଥ ତାର
ବଦଳି ଯାଏ ସତ୍ବର ||
ଦ୍ୱିତୀୟ ମାଧ୍ୟମେ ପରିବେଗ ତାର
ବଦଳି ହୁଅଇ ଭିନ୍ନ
ଦିଗ ବଦଳାଇ ନୂତନ ଦିଗରେ
ଗତିକରେ ତାହା ଜାଣ ||
ଦ୍ବିତୀୟ ମାଧ୍ୟମୁ ରଶ୍ମୀଟି ପୁନଶ୍ଚ
ତୃତୀୟ ମାଧ୍ୟମେ ଗଲେ
ପରିବେଗ ସଙ୍ଗେ ପୁନଶ୍ଚ ବଦଳେ
ପ୍ରତିସରଣାଙ୍କ ଭଲେ ||
ଗତି ପଥ ତାର ମୂଳ ପଥୁ ତେଣୁ
ପାର୍ଶ୍ବ ବିସ୍ଥାପନ କରେ
ସୌର ରଶ୍ମୀ ସ୍ଥିତ ସାତଟି ବର୍ଣ୍ଣର
ସାତରଶ୍ମୀ ଏହା କରେ ||
ସୂରୁଯରୁ ଏକ ଆଲୋକର ରଶ୍ମୀ
ଜଳକଣା ଦେଇ ଗଲେ
ନିର୍ଗତ କିରଣେ ସାତ ରଙ୍ଗ ସାତ
ରେଖାରେ ଯାଏରେ ଭଲେ||
ଏହି ରଶ୍ମୀଗୁଚ୍ଛ ନଭ ପରଦାରେ
ପଡିଗଲେ ଯାଇ ଥରେ
ସାତଟି ରଙ୍ଗର ବର୍ଣ୍ଣାଳୀ ଆଙ୍କିଣ
ଇନ୍ଦ୍ରଧନୁ ସୃଷ୍ଟି କରେ||
କାହା ଧନୁ ନୁହେଁ ଭଲ ଭାବେ ଜାଣ
ଆଲୋକର ପ୍ରକୀର୍ତ୍ତନ
ଇନ୍ଦ୍ରଙ୍କର ଏହା ଧନୁ ନୁହେଁ ଜାଣ
ସୂରଯର କର ଜାଣ ||
ଏହି କଥା କହି ବେଙ୍ଗ ବେଙ୍ଗୁଲୀର
ଗାଲେ ଆଙ୍କିଦେଲା ଚୂମା
ସୂରୁଯର କର ଭିଜା ଓଠେ ପଡି
ଝଟକିଲା ଅରୁଣିମା ||
କେମିତି ଲାଗିଲା ଇନ୍ଦ୍ରଧନୁ କଥା
ମନ୍ତବ୍ୟଟେ ଲେଖିଦିଅ
ଭଲ ଲାଗିଥିଲେ ପସନ୍ଦ କରିବ
ମୋହର ଜୁହାର ନିଅ ||