Library
Profile
ଈଶ୍ବର ତୁମେ ଏବେ କୋଉଠି
ଈଶ୍ବର ତୁମେ ଏବେ କୋଉଠି
ହେ ଈଶ୍ବର ତୁମେ କୋଉଠି ରହିଛ
ଥରୁଟିଏ କହି ଦିଅ
ଯଦି ନ କହୁଛ ତୁମରି ପାଖକୁ
ମୋତେ ତୁମେ ନେଇ ଯାଅ ।
ମିଛ ମାୟା ଭରା ଏଇତ ସଂସାର
ଏଠି ମୋତେ ନ ରଖାଅ
ବିଷାକ୍ତ ଲାଗୁଛି ଏଇତ ଜୀବନ
ଆୟୁଷ ତୁଟେଇ ଦିଅ ।
ସ୍ବାର୍ଥପର ଏଇ ମଣିଷ ସୂତାରୁ
ବାହାର କରଇ ଖିଅ
ଜିରାରୁ ଶିରାକୁ ବାହାର କରେ ସେ
ତୁମେ ତ କଷ୍ଟ ନ ଦିଅ ।
ତୁମେ ଅଛ ବୋଲି ବଞ୍ଚି ଅଛି ମୁହିଁ
ତୁମେ ଦୂରେଇ ନ ଯାଅ
ମାନ ଅଭିମାନ ଯେତେ ପ୍ରଭୁ ଅଛି
ମନରୁ ଦୂରେଇ ଦିଅ ।
ଦୋଷ ଅପରାଧ ମାର୍ଜନା ମୋ କରି
ବାହୁ ଖୋଲି ତୋଳି ନିଅ
ଦଣ୍ଡ ଯଦି ମୋତେ ଦେବାର ତ ଅଛି
ନିଜ ହାତେ ଦେଇ ଦିଅ ।
ନିନ୍ଦା ଅପବାଦ ଦେଇ ପ୍ରଭୁ ଯଦି
ଖୁସିରେ ରହୁଣ ଥାଅ
ସେଇ ଅପମାନ ନିତି ସହୁ ଅଛି
କହୁନି ମୁଁ ତାକୁ ନିଅ ।
ତୁମରି ହାତରେ ଲେଖା ଭାଗ୍ୟ ରେଖା
ତୁମେ ତାକୁ କାଟି ଦିଅ
କପାଳର ସେଇ ଆୟୁଷ ରେଖାକୁ
ଶୀଘ୍ର ଲିଭାଇଣ ଦିଅ ।
ମରିବା ବଞ୍ଚିବା ସମାନ ବଞ୍ଚିକି
କି ଲାଭ ତ କହି ଦିଅ
ଦୋଷ ନ କରି କି ଦୋଷୀ ଯଦି ହୁଏ
କାହିଁକି ବଞ୍ଚେଇ ଥାଅ ।
ସହିବାର ଧୈର୍ଯ୍ୟ ଦେଇଅଛ ବୋଲି
ଏତେ ଦୁଃଖ ଦେଉ ଥାଅ
ବଞ୍ଚେଇ ରଖିକି କି ଲାଭ କାହିଁକି
ଜୀବନ ନେଇ ନ ଯାଅ ।
କୋଉଠି ରହିଛ କହି ଦିଅ ଥରେ
ନିରବତା ଭାଙ୍ଗି ଦିଅ
ଅନ୍ୟ ପାଖେ ଯଦି ନିନ୍ଦିତ କରୁଛ
ଜୀବନ ଦୀପ ଲିଭାଅ ।
ଈଶ୍ବର ତୁମେଟି କୋଉଠି ରହିଛ
ଦେଖା ଥରେ ଦେଇ ଯାଅ
ନେଇଯାଅ ପ୍ରଭୁ ତୁମରି ପାଖକୁ
ପାଦରେ ଆଶ୍ରୟ ଦିଅ ।
