Library
ଈଶ୍ୱରୀୟ ଅନୁଭୂତି
ଈଶ୍ୱରୀୟ ଅନୁଭୂତି
ଈଶ୍ୱରଙ୍କୁ ଟିକେ ଦେଖିବା ପାଇଁକି
କେତେ ମୁଁ ଉପାୟ କଲି
ଦେଉଳକୁ ଗଲି, ତୀର୍ଥରେ ଭ୍ରମିଲି
ଗୀର୍ଜା ଭିତରେ ଖୋଜିଲି |
ମସଜିଦ ଗଲି ଗୁରୁଦ୍ୱାର ଗଲି
ସତସଙ୍ଗ କେତେ କଲି
ଦାନ ପୁଣ୍ୟ କଲି ପୂଜା ପାଠ କଲି
ବ୍ରାହ୍ମଣ ଭୋଜନ ଦେଲି |
ଚାରିଧାମ ଗଲି ଜପ ତପ କଲି
ଘରେ ମାଳି ଗଡ଼ାଇଲି
ପୂଜା ମହୋତ୍ସବ ଦର୍ଶନ କରିଲି
ସାଧୁ ସନ୍ଥ ସେବା କଲି |
ଖୋଜିଲି ଅରଣ୍ୟ ଜନ ନିକେତନ
ଖୋଜିଲି ସାଗର ତଟେ
ଆକାଶ ଖୋଜିଲି ପାତାଳ ଖୋଜିଲି
ଅତିକ୍ରମି କଷ୍ଟେ ମଷ୍ଟେ |
କଲି ଋଷିକେଶ ଆଶ୍ରମେ ପ୍ରବେଶ
କୁମ୍ଭମେଳା ହରିଦ୍ୱାର
କାହିଁ ଅନୁଭୂତି ନହେଲା ମୋହର
ଈଶ୍ୱର କାହିଁ ଥିବାର |
ଆସିଲି ମୁଁ ପୁରୀ ବ୍ରହ୍ମଦାରୁ ହରି
କରିବାକୁ ଦରଶନ
ବାଇଶି ପାବଛେ ଚଢ଼ୁ ଚଢ଼ୁ ପଛୁ
ଡାକିଲେ ଜଣେ ବ୍ରାହ୍ମଣ |
କାହାକୁ ଖୋଜୁଛ ଦୁଃଖ ମନେ ଅଛ
ପ୍ରକାଶ କର ବହନ
ଉଦ୍ଦେଶ୍ୟ ପ୍ରକାଶ କରନ୍ତେ ହସିଲେ
ବୋଇଲେ ହେ ବାପ ଧନ |
ଅଣୁ ଅନ୍ତରୀକ୍ଷ ଯାହାର ପ୍ରକାଶ
ଭୂମିରୁ ଭୂମା ଯେ ବ୍ୟାପ୍ତ
ତୁମରି ମନରେ ତାହାଙ୍କ ନିବାସ
ତୁମର ସେ ଚିର ପ୍ରାପ୍ତ |
ଘଟେ ଘଟେ ପୂରି ଛନ୍ତି ନରହରି
ହୃଦେ ତାଙ୍କୁ ଲୟକର
ଲୋଡ଼ା ନାହିଁ ତୀର୍ଥାଟନ କି ଭ୍ରମଣ
ସବୁଠି ଯାହାର ଘର |
ନାଭିରେ କସ୍ତୁରୀ ଥାଇ ଯେଉଁପରି
ମୃଗ ବୁଲେ ବନ ବନ
ହୃଦାସନେ ତୋର ବିଜେ ଭଗବାନ
କେଣେ କର ଅନ୍ୱେଷଣ |
ପାଇଗଲି ତତ୍ତ୍ୱ ହୋଇ ପ୍ରଣମିତ
ଗୁରୁଦେବ ଶ୍ରୀପୟର
ଅନୁଭବ କଲି ମୋ ମନ ମନ୍ଦିରେ
ବିରାଜିତ ବିଶ୍ୱେଶ୍ୱର |
