ଇଚ୍ଛାର ଶୋଭାଯାତ୍ରା
ଇଚ୍ଛାର ଶୋଭାଯାତ୍ରା
ମେଣ୍ଢାଙ୍କ ଭଳି ଧାଇଁ ଧାଇଁ
ବାଟବଣା ହେବା ଓ
ଶେଷରେ
ଗୋଟିଏ ଇଚ୍ଛାର ଅପମୃତ୍ୟୁ ଘଟଣା
ଆଉ ଶରୀରରେ
ଶୀହରଣ ଖେଳାଉନି ।
ଏମିତି ଅନେକ ଇଚ୍ଛା ବର୍ତମାନ
ସେଇ ମାଟି ରାସ୍ତାରେ
ଦଦରା ଦରଜାର ଅପର ପାର୍ଶ୍ୱରେ
ଜହ୍ନକୁ ଉଙ୍କି ମାରୁଥିବା
ଭଙ୍ଗା ଚାଳର ଫାଙ୍କରେ
ନଇଁ ପଡ଼ିଥିବା ପିଠିର
ବୟସ ଆଢ଼ୁଆଳରେ
ଶେଷ ନିଃଶ୍ୱାସ ତ୍ୟାଗ ପାଇଁ ଅପେକ୍ଷା କରିଛି ।
ମହଣେ ସ୍ବପ୍ନକୁ ଜାଳିବା ପାଇଁ
ମହଣେ କାଠ ବି ମିଳିବା କଷ୍ଟକର
ଅଭାବର ଏହି ମୁହୁର୍ତ୍ତରେ
ପ୍ରତିଶ୍ରୁତିର ସେଇ କୁକୁଡ଼ା ଗୁଡିକ
ବେଶ ସହାୟ ହୋଇଛି
ମୁକ୍ତି ପ୍ରାପ୍ତିର ପଥ ପ୍ରସ୍ତୁତି ପାଇଁ ।
ଶବ, ନିଶ୍ଚିତ ଏକ ଆଶ୍ୱସ୍ତି
ଅକଥନୀୟ ଯନ୍ତ୍ରଣାରୁ ମୁକ୍ତି ପାଇଁ
ଶୋଭାଯାତ୍ରାରେ ବାହାରିବା ପରେ
ପୁଣି ସେଇ ଏକା ପ୍ରଶ୍ନ
ଜୀବନ ସତରେ କ'ଣ
ଏକ ଶୋଭାଯାତ୍ରା ବ୍ୟତୀତ ଆଉ କିଛି ନାହିଁ।