ലൈബ്രറി
പ്രൊഫൈൽ
"ଜୀବନଟା କେବେ........ "
"ଜୀବନଟା କେବେ........ "
ଜୀବନଟା କେବେ ଧାରା ଶ୍ରାବଣର
ନିରୁତା ଲୋତକ ବନ୍ୟା
କେବେ ପୁଣି ସାଜେ ସ୍ନିଗ୍ଧ ବସନ୍ତର
ନବ ବିବାହିତା କନ୍ୟା ll
ଘୋର ନିଦାଘର ବୈଶାଖୀ ଝାଞ୍ଜିରେ
ହୁଏ ଖାଲି ଦହଗଞ୍ଜ
ଆଶାର ସୂରୁଜ ଅସ୍ତଗାମୀ ପଥେ
ଅବେଳରେ ଆସେ ସଞ୍ଜ ll
ସ୍ୱପ୍ନ ଚଇତାଳି ଜୀବନ ବୃକ୍ଷରେ
ଦିଏ ଖାଲି ପତ୍ର ଝଡା
ଆଖି ସାମ୍ନାରେ ଝଡି ପଡେ ସବୁ
ଜୀବନର କୃଷ୍ଣଚୂଡ଼ା ll
ଅସୁମାରୀ ଆଶା ସୀମାହୀନ ସ୍ବପ୍ନ
ସମୟ ସୁଅରେ ପଡି
ଦିଦିନ ବାଟରେ ଅଦିନିଆ ମେଘ
ସବୁତ ଦିଏ ଉଜାଡି ll
ଏ ଜୀବନ କେବେ ଶୀତ ସକାଳର
ଥୋପାଏ ଶିଶିର ବିନ୍ଦୁ
ଅମାବାସ୍ୟାର ଏ ଘନ ଅନ୍ଧକାରେ
ଭ୍ରମ'ର ପୂର୍ଣ୍ଣିମା ଇନ୍ଦୁ ll
ଆର୍ଦ୍ର ହେମନ୍ତର ସୋରିଷ କ୍ଷେତରେ
ଏ ଜୀବନ ପ୍ରଜାପତି
ଉଡି ବୁଲୁ ବୁଲୁ ଅମଡ଼ା ବାଟରେ
ହେଇଯାଏ ତା'ର ଇତି ll
ଶରତର ମାୟା ଚକ୍ରବ୍ୟୁହରେ ଏ
ଜୀବନର କାଶତଣ୍ଡୀ
ଖଣ୍ଡ ଖଣ୍ଡ ହୋଇ ଝଡି ପଡେ ଏଠି
ଗୁଣ୍ଡ ହେଇଯାଏ ଗଣ୍ଡି ll
ତଥାପି ମଣିଷ ବୁଝେନି ନିଜକୁ
ପାରେନି ନିଜକୁ ଚିହ୍ନି
ଆଶା ଅବଶୋଷ କାମନାରେ ପଡି
ଜଳାଏ ଦୁଃଖର ବହ୍ନି ll
