ହଟ୍ ଜୀଲେବି
ହଟ୍ ଜୀଲେବି
ବରଷା ପାଗକୁ ଗରମ ଜିଲାପି
ଖାଇବାକୁ ବଡ ସୁଆଦ
ନାଲି ଟୁକୁ ଟୁକୁ ଲାଗେ ମୁଡୁ ମୁଡୁ
ହଜାଏ ଆଖିର ନିଦ ।
ଦେଖି ଦେଲେ ଥରେ ଲାଳ ଗଡି ଯାଏ
ନା ପାଦ ଅଟକି ଥାଏ
ଗୁଡିଆ ଭାଇର ଚୂଲୀର ପାଖକୁ
ପାଦ ଆପେ ଧାଇଁ ଯାଏ ।
ମଇଦା ଦେହରେ ପାଣି ଖାଦ ଦେଇ
ଗୋଳେଇ ପାଗକୁ କରେ
ଶଢେଇ କଣାରେ ଚଟପଟ ଛାଣି
ଚିନି ସିରାରେ ସେ ଭରେ ।
ଦେଖିବାକୁ କିଏ ଧଳା ହେଇଥାଏ
କିଏ ବା ବାଦାମୀ ଥାଏ
ଲାଲ୍ ମଚମଚ ଜୀଲେବୀ ରଙ୍ଗଟି
ସବୁ ମନ ଛୁଇଁ ଯାଏ ।
ଟାଣ ପାଗରେ ଛଣା ଯାଇଥିଲେ
ବେଶୀ ଭଲ ଲାଗେ ସିଏ
ଚିନି ସିରା ବେଶୀ ପିଇ ଯାଇ ଥାଏ
ମୁଡୁ ମୂଡୁ ଲାଗୁ ଥାଏ ।
ଛୋଟ ଠାରୁ ବଡ ବୁଢା ଠାରୁ ବୁଢୀ
ହୁଏ ସେ ସବୁ ପାଟିରେ
ବିରି ଚାଉଳର ଜିଲାପି ତିଆରି
ରହିଥାଏ ନରମରେ ।
ଖାଇବାକୁ ସେତେ ଭଲ ଲାଗେ ନାହିଁ
ସହଜେ ଛିଣ୍ଡେନି ସିଏ
ଚେମେରି ଜିଲାପି କହି ଅଧିକାଂଶ
ମୁହଁ କେ ଫେରେଇ ନିଏ ।
ଗରମ ଗରମ ଭାରି ଭଲ ଲାଗେ
ଖାଏ ଯିଏ ଜାଣେ ସିଏ
ନାଲି ଜିଲାପିକୁ ଦେଖି ହାତ ଠାରି
ପିଲା ଅଟକାଇ ଥାଏ ।
ମନେ ପଡେ କାନ୍ଧେ ଭାର ବୋହି ଗାଁକୁ
ଜିଲାପି ବିକି ଆଣନ୍ତି
ଧାନ ଚାଉଳ ଟଙ୍କା ଯିଏ ଯାହା ଦିଏ
ହସି ସିଏ ନେଇଥାନ୍ତି ।
କି ସୁନ୍ଦର ସିଏ ଡାକ ମାରୁଥାନ୍ତି
ଢଗ ଢମାଳିକୁ କହି
କେତେ କିସମର ମିଠା ଆଣିଥାନ୍ତି
ସିରା ଯାଉଥାଏ ବହି ।
ଚାରି ପାଖେ ପିଲା ଘେରି ଯାଇଥାନ୍ତି
ସ୍ତ୍ରୀ ଲୋକ ଆସନ୍ତି ଧାଇଁ
ବୁଢା ବୁଢୀ ତାକୁ ଖାଇବା ପାଇଁ କି
ହେଇଥାନ୍ତି ହାଇଁ ପାଇଁ ।
କିଏ କହେ ଟିକେ ରହିଥାଅ ପୁଅ
ଘରୁ ଯାଇ ମୁହିଁ ଆସେ
କରାଟରୁ କିଏ ପଇସା ଦେଇଣ
ଅଣ୍ଟାରେ ତାହାର ଖୋଷେ ।
ଗାଆଁ ଗହଳିର ସେଇ ଦୃଶ୍ୟ ସତେ
କେତେ ମଜା ଲାଗୁଥାଏ
ଗାଆଁ ଦାଣ୍ଡ ପିଣ୍ଡା ଆମ୍ବ ବର ଛାଇ
ଆଖିରେ ଯେ ନାଚି ଯାଏ ।
ଏବେ ସେଇ ଦୃଶ୍ୟ ଅଦୃଶ୍ୟ ହେଲାଣି
ଦୋକାନ ବଜାର ପାଇଁ
ଗାଆଁ ଗଣ୍ଡାର ସେ ବୁଲି ବୁଲି ବିକା
ଗଲାଣି ତ ଲୋପ ପାଇ ।
ଏବେବି ଖାଇବା ଚାହିଦା ରହିଛି
ଟିକେ ସ୍ପୃହା କମି ଅଛି
ବେଶୀ ମିଠା ଖାଇ ଦେଲେ ସତେ କାଳେ
ମଧୁମେହ ହେଉଅଛି ।
କିଏ ବି ଭେଜାଲ କରି ବିକୁ ଅଛି
ଅଧିକ ଲାଭର ଆସେ
ମାଛି ଭଣ ଭଣ କେଉଁଠି ହେଉଛି
ଖାଇଲେ ରୋଗ ତ ଗ୍ରାସେ ।
ଜିଲାପୀକୁ କିଣି ଆରାମରେ ଖାଅ
ଖୁସିରେ ରୁହ ତ ସବୁ
ଅତ୍ୟଧିକ ଲୋଭେ ବେଶୀ ଖାଆନ୍ତୁନି
ସୁସ୍ଥ ରଖ ଶରୀରକୁ ।