Library
Profile
ହସି ଦିଅ ମୋର
ହସି ଦିଅ ମୋର
ହସି ଦିଅ ମୋର ରାଜା କଣ୍ଢେଇ
ବସନି ତୁ ଆଉ ମୁହଁ ଫୁଲେଇ ।
ତୋ ପାଇଁ ରଖିଛି ମୁହିଁ ମଲେଇ
ଚାଟି ଦେ ତୁ ଟିକେ ଜିଭ ଲଗେଇ ।
କେଡେ ସ୍ବାଦ ତାର ଆହାଃ କି ମଧୁର
ଖାଇଲେ ତୁମକୁ ନେବି ବୁଲେଇ ।
ହସି ଦିଅ ମୋର ରାଜା କଣ୍ଢେଇ ।
ମନ ମାରି ଆଉ ବସି ରୁହନା
ଭଲ ଲାଗୁ ନାହିଁ ରୁଷି ବସନା ।
ଅବୁଝା ହୁଅନି କଥା କୁହନା
ତୁମ ବିନା କିଛି ଭଲ ଲାଗେନା ।
କୋଳେ ବସି ଯାଅ କଥା କହି ଦିଅ
ମୋ ମନକୁ ଆଉ ଦୁଃଖ ଦିଅନା ।
ମୋ ରାଜା କଣ୍ଢେଇ ପାଖେ ଆସନା ।
ମୁହଁକୁ ବସିଛ କାହିଁ ଶୁଖେଇ
କଣ କିଛି କିଏ ନେଲା ଚୋରାଇ ।
ଭାଙ୍ଗି ଯାଇଥିଲେ ଦେବି ଗଢେଇ
ହଜି ଯାଇଥିଲେ ଦେବି ଖୋଜେଇ ।
ନୀରବତା ଭାଙ୍ଗି କହି ଦିଅ ଖୋଲି
ଦେବି ତୁମ ହାତେ ସବୁ ଧରେଇ ।
ହସି ଦିଅ ମୋର ରାଜା କଣ୍ଢେଇ ।
ଏମିତି କିଛି ତ ନାହଁ ତୋ ପାଇଁ
ଦେବିନି ବସୁଛୁ ମୁହଁ ବୁଲେଇ
ଯାହା ତୁ ମାଗୁବୁ ସବୁ ତୁ ପାଇ
ତୋ ପାଇଁ ଅଛି ମୋ ପଣତ ଛାଇ ।
ଗୀତ ଗାଇ ତୋତେ ଶୁଆଇ ଦେବି ମୁଁ
ଚାନ୍ଦ ଦେଖେଇବି କୋଳେ ବସେଇ ।
ହସି ଦିଅ ମୋର ରାଜା କଣ୍ଢେଇ ।
ଆଣି ଦେବି କି ବା ରାଣୀ କଣ୍ଢେଇ
ସେଥିପାଇଁ ମୁହଁ ଅଛ ଫୁଲାଇ ।
କଥା ଦେଉଅଛି ଆଣି ବି ଯାଇ
ଖାଇ ଦିଅ ଏବେ ଦେଖି କଣ୍ଢେଇ
ଏ ରାଣୀ କଣ୍ଢେଇ କୁହ ତ କାହାର
ଦେଖି ଦିଅ ଧନ ମୁହଁ ବୁଲେଇ ।
ହସି ଦିଅ ମୋର ରାଜା କଣ୍ଢେଇ ।
