ହସେ ଆମ ବଗିଚା

ହସେ ଆମ ବଗିଚାଟି ନାନା ଫୁଲ ଫଳେ

ପୁଲକିତ ତନମନ ଦରଶନ ଡୋଳେ

ତା'ର ଅପରୂପ ଶୋଭା

ରୂପ ରଙ୍ଗ ବାସ ଯେତେ ବିକାଶଇ ଆଭା ।

ମହକେ ମହକି ଉଠେ ମଧୁକୀଟ ମତି

ଏ ଫୁଲୁ ସେ ଫୁଲ ଉଡ଼ି ଟିକି ପ୍ରଜାପତି

ଗୁଣୁଗୁଣୁ ଗାଇ ଗୀତ

ହରଷରେ ମଧୁ ଚୁମି ପ୍ରାଣ ବିମୋହିତ ।

ଭୁଞ୍ଜି ମିଠା ପକ୍ବ ଫଳ ପକ୍ଷୀ ଆନନ୍ଦିତ

ଢେଣା ମେଲି ଗାଏ ତା'ର ଜୀବନ ସଂଗୀତ

ବଗିଚାର ବିଶେଷତ୍ୱ

ରଖଇ ଏପରି ତା'ର ବଢ଼ାଇ ମହତ୍ତ୍ବ ।

ଉଦ୍ଭିଦ ବଗିଚା ସମ ଧରା ଉପବନେ

ଫୁଲ ସମ ହସୁଥାନ୍ତି ଶିଶୁ କଢି଼ମାନେ

ରଙ୍ଗ ଭରା ଦଳ ମେଲି

ବାସେ ମହକାଇ ନାଚି ଗାଇ ଝୁଲିଝୁଲି ।

ମାଳି ପ୍ରତିଟି ଗଛର ଯତ୍ନ ନେଲା ପରି 

ଶିଶୁ ଯତ୍ନ କଲେ ରତ୍ନ ଝଡି଼ ତା'ର ଶିରୀ

ବଢ଼ି ଧରା ଆଲୋକିତ

ଉଜ୍ଜ୍ବଳମୟ କରଇ ସର୍ବ ମନ-ହୃଦ ।

ପ୍ରଗତିର ମିଠା ଫଳ ଲଭନ୍ତେ ସଭିଏଁ 

ଆନନ୍ଦରେ ମୁଖରିତ ବିହଙ୍ଗ ପରାଏ

ଗାଇ ସୁମଧୁର ଗୀତ

ସୁଖ ସମ୍ପଦରେ ପାନ ଜୀବନ ଅମୃତ ।