ହୋଲି ଓ ଯୁଦ୍ଧ
ହୋଲି ଓ ଯୁଦ୍ଧ
ଏପଟେ ଚାଲିଛି ଫଲ୍ଗୁର ହୋରି
ସେପାଖେ ରକ୍ତର ହୋଲି,
ଏପାଖେ ଚାଲିଛି ଆନନ୍ଦ ଉତ୍ସବ
ସେପାଖର ମୁହଁ ନାଲି ।
ଏପାଖ ପବନେ ମଳୟ ବହୁଛି
ବସନ୍ତ କୁସୁମ ଛୁଇଁ
ସେପାଖର ବାୟୁ ଛାତି ଥରାଉଛି
ବାରୁଦର ଗନ୍ଧ ବାହି ।
ବାଦ୍ୟ ତାନେ ପିନ୍ଧି ଅବିରର ଟୀକା
ହୋଲି ଖେଳେ ଏଠି ଯୁବା
ଅନ୍ୟ ପକ୍ଷେ ଶୁଭେ ରଣରଦୁନ୍ଦୁଭି
ଛୁଟେ ପ୍ରାଣ ନେବା ଦେବା ।
ଜନନୀ ଜାୟା ଓ ଭଗିନୀ କତିରୁ
ବିଜୟର ଟୀକା ପିନ୍ଧି
ଡେଇଁପଡେ ବୀର ରଣପ୍ରାଙ୍ଗଣେ
ଦଶଶିର ଦେଇ ରୁନ୍ଧି ।
ସାମ୍ରାଜ୍ୟବାଦର ଅହମିକା ପାଇଁ
ବିଶ୍ୱ ବୁକୁରେ ଯୁଦ୍ଧ
ନିରବେ ଏ ଚିତ୍ର ଦେଖେ ଶାନ୍ତି ଦୂତ
ମନରେ ନଆଣି ଖେଦ ।
ବାରୁଦ ଦେଖେନି ଶତ୍ରୁ କିମ୍ବା ମିତ୍ର
ଧ୍ବଂସର ଲୀଳା ରଚେ
ମାନବ ସମ୍ବଳ ବିଧ୍ଵଂଶ ହେଉଛି
କରାଳର ଛାୟା ନାଚେ ।
ବିଶ୍ୱର ବୃହତ ଶକ୍ତି ସାଜିସିଛି
ଅନ୍ଧ ଧୃତରାଷ୍ଟ୍ର ପ୍ରାୟ
ଧ୍ବଂସର ଲୀଳାକୁ ଦେଖି ସେ ନଦେଖେ
ସତେ ଅବା ଅସହାୟ ।
ବିଶ୍ୱ ଭାତୃତ୍ବ ନାରା ଆଜି ଫିକା
ଯୁଦ୍ଧ ଲିପ୍ସିତର ଆଗେ
ଦୁଃଖ ଶୋକ ଆଉ ବିଲୟର ଗାଥା
ଜୟୀ ପରାଜୟୀ ଭାଗେ ।
ୟୁକ୍ରେନ ଆଉ ରୁଷିଆ ଦେଇଛି
ତାଣ୍ଡବର ଉପହାର,
କିଭଳି ପାଳିବା ହୋଲି ଦୋଳପର୍ବ
କୁହ ଶାନ୍ତି ସୌଦାଗର ।
ବିଜ୍ଞ, ବିଜ୍ଞାନୀ ଦେଖରେ ଅଗ୍ରଗତି
"ଧ୍ବଂସ" ତୁମ ଅବଦାନ
ଆଧୁନିକ ବୋଲି ନିର୍ମାଣିଲ ଜାରେ
ସିଏ ନିଏ କୋଟି ପ୍ରାଣ ।