Library
Profile
ହଁ ଶୋଇ ଯିବି
ହଁ ଶୋଇ ଯିବି
ଜିଅନ୍ତା ସାମାନ୍ , ରେଡ଼ିମେଡ଼ ଛଇ
ଆଉ ପ୍ଲାଷ୍ଟିକ ହସ ଦେଖେଇ ବିକି ଚାଲିଛନ୍ତି
ସରୁ ଚିକ୍କଣ ମିଛଗୁଡାକୁ ।
କିଣା ବିକା,ନାଚ ଆଉ ଗୀତ
ମଣିଷ ଗୁଡ଼ାକ ଯେମିତି ଯନ୍ତାରେ ପଶି
ସଭ୍ଯ ପଶୁ ହେବାର ମୂଲ୍ୟ ମାଗୁଛନ୍ତି ।
ଏତେ କୋଳାହଳ ଭିତରେ ଅଚାନକ୍
ତୁମେ ଝିଙ୍କିନିଅ ଦେହ ଭିତରକୁ
ବାହାରେ ସବୁ ସେମିତି ଚାଲୁଥାଏ
ଚିରାଚରିତ ପ୍ରଥାରେ ।
ତୁମ ବିନା ସବୁ ଅରୁଚି ଲାଗେ
ଆଉ ଯାହା ବି ଭଲଲାଗେ
ସେ ସବୁ ତୁମର ମରୀଚିକା ।
ସବୁ ଆକାଂକ୍ଷା କାମନା ବାସନାକୁ
ଏକାଠି କରି ଯଦି ଫିଙ୍ଗି ଦିଏ
ତେବେ ତୁମେ କ'ଣ ଆହୁରି ଚିକ୍ ଚିକ୍ କରିବ ?
ତୁମ ଅଭାବକୁ ଏମାନେ ଜବରଦଖଲ କରି ନିଅନ୍ତି
ଆଉ କାନରେ ଫୁଙ୍କନ୍ତି ତୁମ ପ୍ରତି
ଅପ୍ରୀତି ଆଉ ଘୃଣାର ମନ୍ତ୍ର ।
କ'ଣ କରିବି କୁହ ?
ରାସ୍ତାସବୁ ତ ନିଜେ ହିଁ ବନ୍ଦ କରି ରଖିଛି
କେତେ ଯେ ଅଜଣା ଡ଼ରର ନାଲି ଆଖିକୁ ଚାହିଁ ।
ଦିନସବୁ ବିତେ ମଶାଣିର ରାତି ପରି
ଜଣା ନାହିଁ ପୁଣି କେତେଯେ ଯୁଗ
ପଢ଼ି ରହିବାକୁ ହେବ ଟାଣ ପଥର ହୋଇ ।
ସେଦିନ ତୁମ ସହ ଭାସି ଯିବାର ଥିଲା
ହେଲେ କଣ୍ଟା ଗଳାରେ ହିଁ ଲାଖି ରହିଗଲା।
ଦ୍ୱନ୍ଦ୍ୱ , ଧର୍ମସଙ୍କଟ ନା ଅବିଶ୍ବାସ ?
ଗୋଟେ ବିରାଟ ପର୍ବତ କି
ଅଲଂଘ୍ଯ ମରୁଭୂମି ପରି ପ୍ରେମ !
ସେପାରେ କ'ଣ ଅଛି କାହା ପାଖେ ଉତ୍ତର ନାହିଁ
କେହି କେବେ ଆଜିଯାଏଁ କାହିଁ ଫେରି ନାହାନ୍ତି ।
କ'ଣ ଏଇମିତି ଥକିଯାଇ ଶୋଇ ଯିବି
ଏ ଅମଡ଼ା ରାସ୍ତାର ସବୁ ଆଶାକୁ ମାରି
କାଲିର ସୂରୁଜକୁ ଅପେକ୍ଷା ନକରି ?
ହଁ ଶୋଇ ଯିବି ।
