ହଜିତ ଯାଇନି

ସୁଖର ସାଗର  କିଏ ଭାସିବୁଲେ

   ଦୁଃଖେ କିଏ ବୁଡି ମରେ 

ଯାହାକୁ ଯେପରି ଗଢିଛି ବିଧାତା 

   ସିଏ ସେହିପରି ତରେ ll 1

ଦାନ କେ କରୁଛି  ଅର୍ଜିବାକୁ ପୂଣ୍ୟ 

    ମାରୁଛି ଚିପି କେ ତଣ୍ଟି 

ଭୋକିଲା ପେଟରେ ଦାନା ବାଣ୍ଟେ କିଏ 

   କିଏ କାଟେ କାହା ତଣ୍ଟି ll 2

କିଏ ପ୍ରବଞ୍ଚକ  ବିଶ୍ୱାସରେ ବିଷ 

    ପ୍ରବଚନ ଦେଇ ତୋଷେ

ଭଣ୍ଡ, ପ୍ରତାରକ  ମୁଖେ ସନ୍ଥ ମୁଖା 

    ସାଧୁବାଣୀ କହି ରସେ ll 3

    

Advertisement

p>

ଜୀବନ ନାଟକ ରଙ୍ଗ ମଞ୍ଚ ପରେ 

   ନାୟକ ସାଜେ କେ ପୁଣି 

ଖଳନାୟକର  ଅଭିନୟ କରି 

    କାହାକୁ ଦିଏ କେ ହାଣି ll 4

     

ଘରଭଙ୍ଗା ନୀତି ପାଳେ କିଏ ନିତି 

     ଲୁଟେ କିଏ କା ସମ୍ପତ୍ତି 

ଧର୍ଷଣ, ଲମ୍ପଟ ରାହାଜାନି କରି 

    ପେଟ ପୋଷେ ଦିନ ରାତି ll 5

     

ତଥାପି ଧରମ ଈଶ୍ୱର ବିଶ୍ୱାସେ

    ଉଦୟ ହୁଅଇ ରବି 

ମଣିଷପଣିଆ ହଜି ତ ଯାଇନି 

    ଦେଖା ଦିଏ ତାର ଛବି ll 6