ହଜିନାହିଁ ଆଶା
ହଜିନାହିଁ ଆଶା
ହଜିନାହିଁ ଆଶା ହଜିନି ପିପାସା
ହଜିନି ଭରସା ବରାବର
ଲିଭିନାହିଁ ଦାଗ ଲିଭିନି ସରାଗ
ଲିଭିନି ମାଧୁରୀ ମାଧୁର୍ଯ୍ୟର |
ମାନିନାହିଁ ମନ ମାନିନି ବନ୍ଧନ
ମାନିନି ମାନ କି ଅଭିମାନ
ଲଙ୍ଘିନାହିଁ ପ୍ରୀତି ଲଙ୍ଘିନି ସ୍ୱୀକୃତି
ଲଙ୍ଘିନି ସୀମାର ବ୍ୟବଧାନ |
ଡେଇଁନାହିଁ କାହିଁ କୁଳକୀର୍ତ୍ତି ନଈ
ଡେଇଁନି ସମାଜ ବନ୍ଧ ଦାଢ଼
ମାଡ଼ିନାହିଁ କାହିଁ ଲାଜ ଡର ଭୂଇଁ
ମାଡ଼ିନି ମଣିଷ କୃତ ବାଡ଼ |
ସରିନାହିଁ ତାର ପ୍ରେମ ଧନାଗାର
ସରିନି ସାରସ ରସସାର
ବରିନାହିଁ କାରେ ପ୍ରଣୟ ପାଶରେ
ବରିନି ପୁରୁଷ ଅଭିସାର |
ସାଜିନାହିଁ ଧନୀ ପ୍ରେମ ତରଙ୍ଗିଣୀ
ସାଜିନି ସ୍ୱପ୍ନ ସୁନ୍ଦରୀ କା'ର
ଯାଇନାହିଁ କାହିଁ ପ୍ରେମ କଳା ଭୂଇଁ
ଯାଇନି ବିଦ୍ୟାନଗରୀ ଧାର |
ପାହିନାହିଁ ନିଶି ରାଜେ ପୂର୍ଣ୍ଣଶଶୀ
ପାହିନି ଦୁରାଶା ବିଭାବରି
ଲଭିନି ସୁଯୋଗ ଲାଭ ଆଦିଯୋଗ
ଲଭିନି ସଂଭୋଗ କୃଶୋଦରୀ |
ଦହିନାହିଁ ହୃଦ ପ୍ରେମ ମଦେ ଅନ୍ଧ
ଦହିନି କେଉଁ ପ୍ରେମିକ ମନ
ସହିନାହିଁ କିଛି ନିନ୍ଦା ଅପଖ୍ୟାତି
ସହିନି କାହିଁ ଲଜ୍ଜାପମାନ |
ଦେଇନାହିଁ ବିକି ସବୁ ଅଛି ବାକି
ଅକ୍ଷତ ଗରବ ଗଣ୍ଠି ଧନ
ଏବେ ବି ଚାହିଁଛି ଆସିଲେ ମାନସୀ
ମଣ୍ଡିବ ମୋ ହୃଦ ସିଂହାସନ |