ହଜିଛି ଫଗୁଣ
ହଜିଛି ଫଗୁଣ
ମନେ ପଡିଯାଏ ହଜିଲା ସେଦିନ
ଭରା ହସଖୁସି ବେଳା
ସୁରଭି ମହକେ ବାସେ ଦଶଦିଶ
ଯଉବନ ମଧୁଶାଳା ।
ଫଗୁଣ ଆସିଲେ ବାସଇ ବଉଳ
ଜାଗେ ନୀଳ ଆଶା ସ୍ୱପ୍ନ
ଉଲ୍ଲସେ ଜୀବନେ ଆନନ୍ଦ ଉତ୍ସାହ
ଇନ୍ଦ୍ରଧନୁ ସପ୍ତରଙ୍ଗ ।
ଲାଗେ ସୁଶୀତଳ ଆମ୍ର ତରୁ କୁଞ୍ଜ
ସୁମଧୁର କୁହୁ ସ୍ୱନ
ମଳୟ ସମୀର ବହେ ସୁଲୁ ସୁଲୁ
ଚୋରାଇ ନିଅଇ ମନ ।
ପ୍ରିୟାର ଚାହାଣୀ ଚୋରା ଚଇତାଳି
ଅମୃତ ସୁନ୍ଦର ପ୍ରେମ
ଲାଗେ ମଧୁମୟ ଅତି ଆପଣାର
ପ୍ରିୟପ୍ରିୟା ଅନୁପମ ।
ମନ ପ୍ରଜାପତି ପାଗଳ ଭ୍ରମର
ରଙ୍ଗେ ହୁଏ ମତୁଆଲା
ଫୁଲରୁ ଫୁଲକୁ ଉଡି ବୁଲୁଥାଏ
ସହଜେ ଦିଏନି ଧରା ।
ଫିକା ଫିକା ଲାଗେ ଫଗୁଣର ରଙ୍ଗ
ବସନ୍ତ ଯାଇଛି ହଜି
ମିଳନ ପରବ ଫଗୁବୋଳା ଦୋଳ
ଝୁରୁଅଛି ମନ ଆଜି ।