ହିଂସୁକ ମୁହଁରେ ଅହିଂସା ବାଣୀ

କଳିକାଳ ରୀତି ବଡ ବିପରିତ

କିଏ ଭଲ ଭେଲ ନ ହୁଏ ଚିହ୍ନି

ଦୁୁଷ୍ଟ ସଇତାନ କରେ ବେଦପାଠ

ଅବାଟରେ ଭ୍ରମେ ନୀତି ଆଇନୀ ।

ଚଢି ଗାଡିଘୋଡ଼ା ଫୁଲାଏ ନିଶକୁ

ଭ୍ରଷ୍ଟ ଦୁରାଚାରୀ ଠକ ଦଲାଲ

କାଟଇ ତଣ୍ଟିକୁ ଖଣ୍ଟ ସେବକାରୀ

ନିଶା କଳାଧନ ବଢେ ପ୍ରବଳ ।

ବିନା ପରିଶ୍ରମେ ରାତିକୁ ହାତିଏ

କୋଠା ଗଢି ଉଠେ ମାଳକୁ ମାଳ

ବଢଇ ଧନୀକ ଥନ୍ତଲ ଉଦର

ଫୁୁଙ୍ଗୁୁଳା ଗରିବ ଘର ଅନ୍ଧାର ।

ତୋଳିଦେବେ ହାତେ ଆକାଶରୁ ତାରା

କରନ୍ତି ଥୋକାଏ ଭାଷଣବାଜି 

ବଢି ବଢି ଚାଲେ ଦୂରିତ କଷଣ

ଛୁଏଁ ଆକାଶକୁ ରେଖା ଗରୀବି ।

କାଗଜ କଲମେ ସଫଳ ଯୋଜନା

ହୁଏନି ବାସ୍ତବ କାର୍ଯ୍ଯାନ୍ବୟନ

ଶିକ୍ଷାସ୍ବାସ୍ଥ୍ୟ ନାମେ ଚାଲେ ବ୍ଯବସାୟ

ବିଳମ୍ବିତ ହୁଏ ନ୍ଯାୟ ପ୍ରଦାନ ।

ଠକଭଣ୍ଡ ଯେତେ ବଖାଣନ୍ତି ଜ୍ଞାନ 

ହିଂସୁକ ମୁହଁରେ ଅହିଂସା ବାଣୀ

ନାଚାର ଈଶ୍ୱର ସନ୍ଦୀହାନ ଧର୍ମ

ତନ୍ଦ୍ରା ତେଜ ଜାଗ ସୁଜ୍ଞାନୀ ଗୁଣୀ ।