ହିମାଦ୍ରୀ ଭ୍ରମଣ
ହିମାଦ୍ରୀ ଭ୍ରମଣ
ନମସ୍ତେ ଅପର୍ଣ୍ଣାମାତା ତୁମ୍ଭ ପିତ୍ରାଳୟ ।
ପରମ ତୃପ୍ତି ଲଭିଲୁ ଦେଖି ହିମାଳୟ ll
ଉତ୍ତର ଦିଗେ ପୃଥିବୀ ମାନଦଣ୍ଡ ଯଥା l
ଗିରି ରାଜ ହିମାଳୟ ଟେକିଅଛି ମଥା ll
ଏଭରେଷ୍ଟ, ଅନ୍ନପୂର୍ଣ୍ଣା ମହା ମହା ଶୃଙ୍ଗ ।
ମଥା ଟେକିଛନ୍ତି ଯଥା ଅନନ୍ତ ଭୁଜଙ୍ଗ ll
ହିମାଦ୍ରୀ ଶିଖରେ ପୁଣି କୈଳାଶପର୍ବତ l
ବସତି ରଚି ଅଛନ୍ତି ବାବା ଉମାକାନ୍ତ ll
ମନୋହର ହ୍ରଦ ପୁଣି ମାନ ସରୋବର l
ପାରିଲୁନି ଦେଖି ଯାହା ଅଟେ ବହୁଦୂର ll
ତୋ କରୁଣାବଳେ ବାବା ପଶୁପତିନାଥ l
ଦର୍ଶନେ ଲଭିଲୁ ଆମ୍ଭେ ସୁକୃତ ବହୁତ ll
ଗାଙ୍ଗଟକ ଠାରେ ଦେଖି କାଞ୍ଚନ ପର୍ବତ l
କାଞ୍ଚନଜଙ୍ଗା ତନୁ ଯା ତୁଷାରେ ଆବୃତ୍ତ ll
ଦାର୍ଜିଲିଙ୍ଗ ମନୋରମ ଶଇଳ ନିବାସ l
ଦୁଇ ଦିନ ପାଇଁ କଲୁ ସୁଖମୟ ବାସ ll
ବୃକ୍ଷ,ଲତା ସୁଶୋଭିତ ହରିତ ଅରଣ୍ୟ l
ତହିଁ ନିର୍ଭୟେ କ୍ରୀଡ଼ନ୍ତି ପଶୁ ପକ୍ଷୀ ଗଣ ll
ନୀଳ ଶୈଳ ମଧ୍ୟେ ପୁଣି ଲାଗିଥିଲା ବୃଷ୍ଟି l
ହେ ବିଶ୍ୱବିନ୍ଧାଣି ଜୟ,ଧନ୍ୟ ତଵ ସୃଷ୍ଟି ll
କାଷ୍ଠର ଅଟ୍ଟାଳି ମୟ ମନୋହର ପୁର l
କାଠମାଣ୍ଡୁ ରାଜଧାନୀ ନେପାଳ ନବର ll
ଶ୍ରୀକାମଚଣ୍ଡୀ ଦର୍ଶନେ ପୁରାଇଲୁ ଆଶା l
କାଉଁରୀ କାମାକ୍ଷା ସଦା ବିପଦେ ଭରସା l
ଠାବେ ଠାବେ ଭଗବାନ ବୁଦ୍ଧଙ୍କ ଦର୍ଶନ l
କରୁଣା ମୟଙ୍କ ପାଦେ ବାଞ୍ଚିଲୁ ଶରଣ ll
ଚେରାପୁଞ୍ଜିଠାରେ ଦେଖି ବାଦଲର ଘଟା l
ପୁଞ୍ଜି ପୁଞ୍ଜି ସାଉଁଟିଲୁ ସ୍ମୃତି ଛତା ଗୋଟା ll
ପନ୍ଦର ଦିନେ ଏ ଯାତ୍ରା ମନୋହର ଅତି l
ସଙ୍ଗେ ରହିଥିଲେ ମହାରାଣୀ ଅରୁନ୍ଧତୀ ll
ସର୍ପିଳ ପାହାଡ଼ି ପଥେ ଯାତ୍ରା ଥିଲା କଷ୍ଟ l
କଥା ଅଛି ଭାଇ କଷ୍ଟେ ମିଳନ୍ତି ଶ୍ରୀକୃଷ୍ଣ ll
ଶେଷରେ ଦର୍ଶନ କଲୁ ମାୟାପୁରେ ଆସି l
ମାୟାଧର ଗୋପୀନାଥ ପ୍ରଭୁ ବ୍ରହ୍ମରାଶି ll
ଜୟ ଜୟ ଜଗନ୍ନାଥେ ବୁଦ୍ଧ ଅବତାରେ l
ଚରଣେ ଶରଣ ଜୟ ଜଗଦୀଶ ହରେ ll