ଲୋଡ଼ାନାହିଁ ମୋ ନିର୍ବାଣ

ରୂପଶ୍ରୀ ବିକଳେ ରୋଦନ କରଇ

ସାରୀପୁତ୍ତ ଫେରି ଆଆ l

ହୀନିକପାଳି ମୁଁ ଏକୋଇ ବଳାରେ

ନାହିଁ ମୋର କେହି ସାହା l

କୋଟିନିଧି ମୋର ଅଟୁ ତୁ ବାବୁରେ

ମୋ ମନ ଆକାଶ ତାରା l

ତୋର ବିନା ଗୃହ ଶମଶାନ ମୋର

ଫେରିଆ ଧନ ମୋ ପରା l

ଭିକ୍ଷୁ ସାରୀପୁତ୍ତ ପ୍ରଭୁ ବୁଦ୍ଧଙ୍କର

ପଟ୍ଟଶିଷ୍ୟ ଶିରୋମଣି l

ପୂତ ଓ ପବିତ୍ର ମହିମା ଯାହାର

ଜନେ ହେଉଛନ୍ତି ଗୁଣି l

ମାଆ ମନ ତାର ବୁଝିବ କି ଅବା

ବ୍ୟଥିତ ଅତି ଅଧୀର l

ଲୋଡ଼ା ନାହିଁ ସେହି ନିର୍ବାଣ ପଥ

ଭଗବାନ କ୍ଷମା କର l

ଶରଣଂ ଗଚ୍ଛାମି,ବୁଦ୍ଧମ୍, ସଂଘଂ ,

ଭିକ୍ଷା ଦେହୀ, ଭିକ୍ଷାମ୍ ଦେହୀ !

କୁଟୀର ଦ୍ଵାରରେ ଶବଦ ଶୁଭିଲା

ରୂପଶ୍ରୀ ଆସିଲା ଧାଇଁ l

ଶୀର୍ଣ୍ଣକାୟ ବପୁ ଲଣ୍ଡିତ ମସ୍ତକ

ମୁଖେ ତା ଅପୂର୍ବ ଜ୍ୟୋତି l

କୁହ ଭିକ୍ଷୁ ମୋର ପୁତ୍ର ସମାଚାର

ସାରୀପୁତ୍ତେ ଦେଖିଛନ୍ତି ?

ମୁହିଁ ସାରୀପୁତ୍ତ ତୋର ପୁତ୍ର ମାଆ

ଆସିଅଛି ଭିକ୍ଷା ଅର୍ଥେ l

ଦିଅ ମୋତେ ଭିକ୍ଷା ନିଅ ଏହି ଦୀକ୍ଷା

ଆସ ମା' ନିର୍ବାଣ ପଥେ l

ଫେରିଯାଅ ଭିକ୍ଷୁ ଫେରିଯାଅ ତୁମ୍ଭେ

ଲୋଡାନାହିଁ ମୋ ନିର୍ବାଣ l

ଭାଙ୍ଗି ଯାଉ ଏହି ସଂଘଟି ତୁମ୍ଭର

ଅଭିଶାପ ମୋର ଘେନ l