ହେରା ପଞ୍ଚମୀ

ବାଆ ପାଣି ପିଇ ଝୁଲ ମୋ ହାତୀ

କାଳିଆ ସୁନା ମୋ ଝୁଲ

ଛୁଇଁ ଛୁଇଁ ମାଟି ମା'ରେ ପହଣ୍ଡି

ଭାଇ ଜୟ ଜଗନ୍ନାଥ ବୋଲ ।

ପାଟ ଦଉଡିକୁ  ଟାଆଣେ ଭିଡିକି

  ପିଠି ଆଡୁ ଠେସ ମାର

କହୁଣି କାନ୍ଧକୁ  ଦେହରେ ଲଗାଇ

  ବୋଲ ଭାଇ ହରିବୋଲ

   ଝୁଲ ବାଇମନ ଝୁଲ

ଅଗୁରୁ ଚନ୍ଦନ  ଦୟଣା ତୁଳସୀ

  ଟାହିଆରୁ ଖସୁ ଫୁଲ ।

ଅଣ୍ଟାକୁ ହଲାଇ  ଘଣ୍ଟୁଆଳ ଭାଇ

   ବଜା ଘଣ୍ଟ ଠଣ ଠଣ

ପହଣ୍ଡିରେ ବିଜେ କାଳିଆ ସୁନା ମୋ

   ପ୍ରବଳ ମତ୍ତ ବାରଣ

  ଦିଶେ କେଡେ ଗୋଲଗାଲ

କଳା ବାମନ ମୋ  ବସିଣ ରଥରେ

   ହସୁଥିବ ମୁଲମୁଲ ।

ଶରଧା ବାଲିରେ  ଆଡପ ଦର୍ଶନ

  ସୁବ୍ୟଞ୍ଜନ ପୋଡ଼ପିଠା

କାଳିଆ ସୁନା ମୋ  ଭୁଞ୍ଜିବ ମଉଜେ

  ହେରା ପଞ୍ଚମୀକୁ ଭଟ୍ଟା

  ମାଆ ଲକ୍ଷ୍ମୀ ଲାଲଲାଲ

ରାଗ ଜରଜରେ  ଭାଙ୍ଗିବେ ରଥକୁ

  ହୋଇବ ଦକ୍ଷିଣ ମୋଡ଼ ।

ବାହୁଡା ବିଜୟେ  ରାଜରାଜେଶ୍ୱର

  କାଳିଆ ମୋ ସୁନାବେଶେ

ଦେବ ଦରଶନ  ସିଂହ ଦୁଆରରେ

  ଶ୍ୟାମ ନଟବର ରସେ

  ବିଜେ ହେବ ଅନ୍ତପୁର

ନିଳାଦ୍ରି ନିକୁଞ୍ଜେ  ଭାଙ୍ଗିବ ଗୁମାନ

  ରସଗୋଲା ଗୋଲଗାଲ ।