Library
ହେନ୍ତାଳ ଜଙ୍ଗଲ
ହେନ୍ତାଳ ଜଙ୍ଗଲ
ହେନ୍ତାଳ ଜଙ୍ଗଲ ମହତ୍ତ୍ଵ ଜାଣିବା
ଆସ ହେ ଭଉଣୀ ଭାଇ
ଲୁଣା ଜଙ୍ଗଲର ସୁରକ୍ଷା ଚିନ୍ତାରେ
ସଭିଏଁ କର୍ମଠ ହୋଇ !
ଉଚ୍ଚ ନଦୀ ବନ୍ଧ ମୃତ୍ତିକା କ୍ଷୟକୁ
ସହଜେ ରୋକୁଛି ଆଗ
ସାମୁଦ୍ରିକ ଝଡ଼ ବାତ୍ୟାର ପ୍ରକୋପ
ଦବାଇ ଦେଉଛି ବାଗ,
ଲୁଣା ଜଙ୍ଗଲକୁ କରିବାନି ନଷ୍ଟ
ବୃକ୍ଷକୁ ନିଜର ଥାଇ !
ବିଭିନ୍ନ ପ୍ରଜାତି ପକ୍ଷୀମାନଙ୍କର
ରହିଛି ଏଠାରେ ବାସ
କଙ୍କଡ଼ା ଚିଙ୍ଗୁଡ଼ି କେତେ ମାଛ ପୁଣି
ବଢ଼ାନ୍ତି ଅଣ୍ଡାରେ ବଂଶ,
ଜଳଚର ଜୀବ କଥାଟି ବୁଝିବା
ପ୍ରକୃତି ପ୍ରେମରେ ଯାଇ !
ସ୍ଥଳ ବୃକ୍ଷ ଠାରୁ ଲୁଣା ଜଙ୍ଗଲରେ
ଅଧିକ ଗୁଣର ବୃକ୍ଷ
ଅଙ୍ଗାରକାମ୍ଳକୁ ଗ୍ରହଣ କରିବା
ଅଧିକ ଭାବରେ ଦକ୍ଷ,
ମଣିଷ ପାଇଁକି ଉପକାରୀ ସତେ
ଭଲରେ ପାରୁଛୁ ଜୀଇ !
ପୃଥିବୀ ଉତ୍ତାପ ଶୀତଳ କରୁଛି
ଲୁଣା ଜଙ୍ଗଲର ସ୍ଥିତି
ପାଗ ଅନୁକୂଳ ରଖିବା ଦାୟିତ୍ବ
ରଖିଛି ଅନେକ ଖ୍ୟାତି,
ଉଚ୍ଚ ଜୁଆରକୁ ପ୍ରତିହତ କରେ
ବେଳାକୁ ଅଭୟ ଦେଇ !
ଫଣି, ଫାଇଲିନ୍, ହୁଡୁହୁଡ୍ ସାଥେ
ସୁନାମୀ ଭୋଗିଛେ କଷ୍ଟ
ଦୈବୀ ଦୁର୍ବିପାକ ଏମିତି ବୋଲିକି
ସମୟ କରନି ନଷ୍ଟ ,
ପ୍ରତିକାର ଲାଗି ସଜାଗ ହୋଇବା
ହେନ୍ତାଳ ବଣକୁ ନେଇ !
