ହେ ଗୁରୁଦେବ

   

ତମସା ପଥରୁ ଆଲୋକ ପଥର ଅନୁଭବ

ତୁମ ପ୍ରୟାସରେ ସବୁକିଛି ଏଠି ସମ୍ଭବ

ହେ ଗୁରୁଦେବ, ନମୋ ଗୁରୁଦେବ । 

ଆଜି ଯେଉଁଠି ମୁଁ ଆସି ପହଞ୍ଚିଛି

ସବୁ ପରା ତୁମ ଦାନ

କେମିତି ବର୍ଣ୍ଣିବି ତୁମର ମହିମା

ତୁମେ ପରା ମହୀୟାନ । 

ଶବ୍ଦର ଅଛି ଯେ ଊଣା ଶବ୍ଦକୋଷେ

ତୁମ ମହାନତା ଲେଖିବା ପାଇଁ

ତଥାପି ହେ ଗୁରୁ ଲେଖୁଛି ଦିଧାଡି

ଭୁଲ ଥିଲେ କ୍ଷମା କରିବଇଁ । 

ତୁମ ଉପସ୍ଥିତି ଜଗତ ପାଇଁ କି

ପୂର୍ଣ୍ଣିମାର ଚାନ୍ଦ ପରି

ତୁମେ ନଥିଲେ ଏ ପୁରା ବିଶ୍ୱ ପରା

ଉଆଁସେ ରୁହନ୍ତା ଘେରି । 

ଶିକ୍ଷାର ପଥକୁ ଟାଣିନେଇ ମୋତେ

ଦୁନିଆକୁ ଚିହ୍ନେଇଲ

ଠିକ୍ ଆଉ ଭୁଲର ଫରକ ଦେଖାଇ

ମୋ ସ୍ଥିତି ସୁଦୃଢ଼ କଲ । 

ମୁକ୍ତ ଆକାଶର ବିହଙ୍ଗ ସଜାଇ

ଡେଣାରେ ରଙ୍ଗ ଭରିଲ

ଉଡିବା ବିଶ୍ୱାସ ତୁମ ଦାନ ଗୁରୁ

ଋଣୀ ମୋତେ କରିଦେଲ । 

ଗୁରୁଙ୍କ ଋଣକୁ କିଏ ବା ସୁଝିବ

ଏତେ ଶକ୍ତି ଅବା କାହିଁ

ମୁଁ ଛାର ମଣିଷ କେମିତି ସୁଝିବି

ଆଶା ବୈତରଣୀ ନଈ । 

ମୋ ପାଖରେ ଥିବା ତୁମ ଶିକ୍ଷା ଗୁରୁ

 ଖୁସିରେ ଦେବି ବିତରି

ଜଗତ ହିତରେ ଶିକ୍ଷା ମୋ ଲାଗିବ

କହୁଛି ଶପଥ କରି । 

ଚାହିଁ କରି କେହି ନପାରିବେ ନେଇ

 ତୁମରି ଅନନ୍ୟ ସ୍ଥାନ

ଯୁଗେ ଯୁଗେ ଗୁରୁ ତୁମେ ଯେ

   ମହାନ, ଭିନ୍ନ ତୁମ ଅବଦାନ । 

ତୁମ ଚଲାପଥେ ଚାଲିବି ହେ ଗୁରୁ

 ସାରା ଜୀବନ ପାଇଁ

ତୁମ ପାଦତଳେ ମଥା ସବୁବେଳେ

  ସମ୍ମାନରେ ଯିବ ନଇଁ ।  

ତମସା ପଥରୁ ଆଲୋକ ପଥର ଅନୁଭବ

ତୁମ ପ୍ରୟାସରେ ସବୁକିଛି ଏଠି ସମ୍ଭବ

ହେ ଗୁରୁଦେବ, ନମୋ ଗୁରୁଦେବ ।