ହେ ଗୁରୁ ତୁମେ

ହେ ଗୁରୁ ତୁମେ     ପ୍ରାତଃ ସ୍ମରଣୀୟ

       ଚିର ବନ୍ଦନୀୟ ତୁମେ

ଅଜ୍ଞାନ ତିମିର       କରି ଦେଇ ଦୂର

      ଜ୍ଞାନାଲୋକ ଜାଳ ତୁମେ ।

ତୁମରି ଆଶିଷେ      ମିଳେ ଶୁଭ ଫଳ

       ସକଳ କାର୍ଯ୍ୟେ ସଫଳ

ତୁମ ଦୁଇ ହାତ      ଛାୟା ପ୍ରଦାୟକ

      ହୋଇ ରହୁ ଚିର କାଳ ।

ଅବାଟରେ ଗଲେ      ବାଟକୁ ଆଣିଣ

       ଜୀବନ ଗଢିବା କାମେ

ଜୀବନ ଯୁଦ୍ଧରେ      ସାହସେ ଲଢିଣ

       ଜିତିବା ଶିଖାଅ ତୁମେ ।

ତୁମେ ଦୟାନିଧି      ଜ୍ଞାନର ଜଳଧି

      ସ୍ନେହ କ୍ଷମା ଅନୁପମ

ତୁମ କୃପାବାରି      ପାଥେୟ ସବୁରି

      ନାହିଁ କେହି ତୁମ ସମ ।

ତୁମ ଶିକ୍ଷା ବିନା       ସକଳ ଅଚଳ

        ଚାଲିପାରିବନି କିଛି

ସଂସାର ନାମକ       ଶବଦ ବିଶ୍ବରୁ

      ହୋଇଯାଇପାରେ ପୋଛି ।

ଚାଲିବାକୁ ତୁମେ    ଦେଖାଇଣ ପଥ

    ସଂସାର ଦୁର୍ଗମ ପଥେ

ଖୋଲିଦେଇଅଛ    ଜ୍ଞାନ ଚକ୍ଷୁ ତୁମେ  

    ଅଜ୍ଞାନାନ୍ଧାର ନିଶିଥେ ।

ତୁମେ ବ୍ରହ୍ମା ବିଷ୍ଣୁ       ତୁମେ ମହେଶ୍ବର

        ତୁମେ ସାକ୍ଷାତ ଈଶ୍ବର

ତୁମେ ପରଂବ୍ରହ୍ମ        ସଂସାରରେ ସାର

       ଘେନ ପ୍ରଣତି ମୋହର ।