ହେ ଆନନ୍ଦ ମୟ ଭାଗ -୩
ହେ ଆନନ୍ଦ ମୟ ଭାଗ -୩
ଯେପରି ଜାଣିଛି ପୂଜୁଛି ସେପରି
ଗ୍ରହଣ କର ହେ!ପୂଜା
ସକଳ ସଂସାର ମଉଡମଣୀତୁ
ତୁ ପରା ଶ୍ରୀକ୍ଷେତ୍ର ରଜା l
ରଜା ପାଇଁ ସଜା କେତେ ପାରିପାଟ୍ଟୀ
ମୋ ସମୀପେ ନାହିଁ ତାହା
ପ୍ରକୃତି ରାଣୀ ମୋ ସଜାଇ ବସିଛି
ତୁମେ ଦେବ ବୋଲି ରାହା l
ଆଳଟ ଚାମର ପବନ ଦେବତା
କରନ୍ତି ସରାଗ ମନେ
ପୁଷ୍ପଗୁଚ୍ଛ ସାଥେ ବିଞ୍ଚନ୍ତି ହରଷେ
ମିଳିବ କି ଭାଗ୍ୟ ଜନେ l
ହସ ହସ ବଦନ ହେ ଦିବ୍ୟ ଲୋଚନ
ଦିଶୁଅଛି କେଡ଼େ ଶୋଭା
ନରଠୁଁ କନ୍ଦର୍ପ ଦେଖିଲେ ତୁମକୁ
ହୋଇଥାଅ ମନଲୋଭା l
ଗଳାରେ ଲମ୍ବିଛି କୌସ୍ତୁଭର ହାର
କର୍ଣ୍ଣରେ ଶୋହେ କୁଣ୍ଡଳ
ଶୁଭ୍ର ସୂତ୍ର ସାଜେ ଶ୍ରୀ ଯଜ୍ଞପବିତ୍ର
ବକ୍ଷରେ ରଚି ମଣ୍ଡଳ l
ଲଳାଟରେ ଚିତା ଗୋରୁଚନା ଦିଶେ
ବାଳ ଭାନୁ ଉଦେ ସମ
ସମୀପେ ବସନ୍ତି ସୁଦର୍ଶନ ଭଦ୍ରା
ବଡ଼ ଭାଇ ବଳରାମ l
କି ଦେବି ଉପମା ହେ କଳା ଠାକୁର
ଦେବାକୁ ଉପମା ନାହିଁ
ସକଳ ଦେବତା ଚଳନ୍ତି ଆଦେଶେ
ଦାରୁ ବ୍ରହ୍ମ ବିଜେ ଯହିଁ l
ପ୍ରଭାତ ସୁରୁଜ ସୁନେଲି କିରଣ
ଢାଳନ୍ତି ଯତନ ଭରେ
ଶୁଭ୍ର ଆଲୋକର ଧାରା ବିଛୁରିତ
ହୁଏ ମହୀ ମଣ୍ଡଳରେ l
କ୍ରମଶଃ