ହାଟ ତାଲିକା

ନାଟ ଲଗାଇଛ ହାଟ ବସାଇଛ

   ହଟହଟା କେତେ କରୁଥାଅ

ବାଟରୁ ଉଠାଇ ହାଟରେ ବସାଇ

  କାହୁଁ ହାଟ ସଉଦା କରାଅ ॥

ଭ୍ରମରେ ଭ୍ରମାଇ  ଭ୍ରମିତ କରାଇ

   ଭଉଁରି ଖେଳାଅ ମହାବାହୁ

ହାଟରେ ତୋହର ମାୟାର ଚାଦର 

    ସବୁ ଦିଶୁଥାଏ ଦାଉ ଦାଉ ॥

ଆସିଥିଲି ଏକା ଧରି ମୁଁ ତାଲିକା

  ଭବ ହାଟରୁ କିଣିବି କିଛି 

ମାୟାର ବଜାରେ ମଜିଲେ ମଜାରେ

   ପାରିଲିନି ମୁହିଁ ପୁଣ୍ୟ ବାଛି ॥

ଭାରି ଝଲମଲ ଲାଗୁଥିଲା ଭଲ 

  ସମୟଟା ପୁରା ଗଲା କଟି

ଚାଲି ପାରୁନହିଁ  ବାଛିବି କେମିତି

  ପାପରୁ ପୁଣ୍ୟକୁ ଖୁଣ୍ଟି ଖୁଣ୍ଟି ॥

ପଛେ ଆସି କେତେ ଗଲେଣି ହାଟରୁ

   ସଉଦା ସରୁନି ମୋର ଏଠି

କଲାକର୍ମ ଫଳ ଭୋଗୁଛି ରେ ମୁହିଁ

   ଜାଣିନି କେବେ ମିଳିବ ଛୁଟି ॥

ଗଲା ବେଳେ ପିଣ୍ତ ଭଜୁଥାଉ ତୁଣ୍ତ

   ଜଗନ୍ନାଥ ଜଗନ୍ନାଥ ଏକା

କରୁଣାରୁ ତବ  ଉଣା ନକରିବ

 ମନେ ପକାଇବ ହାଟ ତାଲିକା ॥