ହାରିବା ପଣରେ ବିଜୟିନୀ

ଅବ୍ୟକ୍ତର ଭାବ ବ୍ଯକ୍ତର ଶବ୍ଦରେ ଦୋଳାୟିତା ମୁଁ ବିଜୟିନୀ 

ଅସ୍ଥି ମଜ୍ଜାଗତ ସ୍ପନ୍ଦିତ ରୁଧିରେ ହୃଦୟର ପ୍ରାଣଦାୟିନୀ 

ବାର ବାର ଖୋଜେ ବସନ୍ତ ଠାବକୁ ମୋ ଅନ୍ତରାତ୍ମା ପ୍ରଦେଶରେ

ତିଳ ତିଳ ଜଳେ ମୁକ୍ତ ହୀରାଟିଏ ବନ୍ଧୁର ଗନ୍ତବ୍ୟ ପଥରେ

ଅଶୋକ ବନରେ ନଜର ବନ୍ଦିନୀ ସତୀତ୍ବର କଙ୍କଣ ନାଇ

ବକ୍ଷ ଦେଶ ଦେଇ ଚଳ ସ୍ରୋତସ୍ବିନୀ ଶୁଷ୍କ ମୃତ୍ତିକାକୁ ଭିଜାଇ 

ପକ୍ବ ଯଉବନେ ଚଞ୍ଚଳା ନୟନେ ମୁଁ ଉଛୁଳା ଯମୁନାଟିଏ

ପ୍ରତି କ୍ଷଣେ କ୍ଷଣେ ସୁଖ ଅନ୍ବେଷଣେ ଆନମନା ହରିଣୀଟିଏ

ଶିଆଳି ଲଟାର ଛନ୍ଦେ ଛନ୍ଦାଛନ୍ଦି ପ୍ରୀତି ଫଗୁଣ ରଙ୍ଗ ପାଇଁ 

ମରୁ ମରୀଚିକା ଭ୍ରାନ୍ତ ପଥେ ପଥେ ତୃଷାର୍ତ୍ତି ପଥିକଟି ମୁହିଁ 

ଝରା ଶ୍ରାବଣର ବିଜନ ରାତ୍ରିରେ ନିମ୍ନଗା ମୁକ୍ତା ବାରିଧାରା

ସମୟ ସ୍ରୋତରେ ଅବିରାମ ଦିଗେ ମୋକ୍ଷ କାମିନୀଟିଏ ପରା

ବନ୍ଧୁର ପଥରେ ବେଖାତିର ପଣ ଅନ୍ତରର ଶୁଦ୍ଧତା ପାଇଁ 

ବାର ବାର ଅତ୍ର ଉପେକ୍ଷିତ ଜୀବ ବିଜୟର ମୁକୁଟ ନାଇ