ଗୁହାରି ଶୁଣ

ତୁମଦ୍ୱାରା ସର୍ଜିତ ମାନବ ତୁମେ ଜଗତ କାରଣ

ଜନମ ତୁମ ଆଜ୍ଞାରେ ତୁମେ ହିଁ ମରଣ କାରଣ ।

କାହାକୁ କହିନପାରି ତୁମରି ପାଶେ ଲୁହ ଢାଳେ

ତୁମେ କ୍ଷଣିକେ ହସାଇପାର ଦୁଃଖ କରି ହରଣ ।

ପରିଷ୍କାର କର ପଥ ଭ୍ରମେ ପଡ଼ିଛି ମଣିଷ ମନ

ଗୁହାରୀ ଶୁଣ ହେ ଜଗନ୍ନାଥ ବିଶ୍ୱର ଭଗବାନ ।

ଅଭିମାନ, ଅଳି ଓ ଅର୍ଦ୍ଦଳି ଛୁଏଁ ତୁମରି ଚରଣ

ଦୂରକର ବିକର୍ଷଣ ଏମନକୁ ଟିକିଏ ହେ ଟାଣ ।

ତୁମଠାରୁ ମୁଁ ଏ ଶରୀରେ ତୁମେ ହିଁ ବିଦ୍ୟମାନ

ତୁମେ ଶାସ୍ତ୍ର-ଶସ୍ତ୍ର ପ୍ରଭୁ ଆଧ୍ଯାତ୍ମିକ ଠାରୁ ବିଜ୍ଞାନ ।

ଦୂରକରି ସଂଶୟ ଦ୍ୱନ୍ଦ ଏ ଆତ୍ମାର କଥା ଶୁଣ

ଗୁହାରୀ ଟିକିଏ ଶୁଣ ଚକାଆଖିଆ ଦେଇ କର୍ଣ୍ଣ ।

ତୁମେ ଆକାର, ନିରାକାର କରିଛ ଧରା ଧାରଣ

କ୍ଷଣେ କ୍ଷଣେ ବଦଳେ ଜୀବନ ଭାଙ୍ଗଇ ସପନ ।

ଏ ମନର ଗଛିତ ଲୁହ ଛାତି ଭର୍ତ୍ତି କୋହ ଜାଣ

ତୁମେ ଈଶ୍ବର ସତ୍ୟ, ବାସ୍ତବ ତୁମେ ହିଁ ପ୍ରମାଣ ।

ଅନ୍ତଃର ହୃଦୟ କଥା କହୁଛି ଅଧମ ପ୍ରତି କ୍ଷଣ

ଗୁହାରି ଶୁଣ ଭଗବାନ ଗୁହାରୀ କହୁଛି ଶୁଣ ।