ଗ୍ରୀଷ୍ମ ମିଆଦ

ମଧୁମାସ ଅନ୍ତେ ଗ୍ରୀଷମ  ଆସେ ଧରାପୃଷ୍ଠକୁ

ନିଦାଘ ବୈଶାଖେ ଆସଇ ଧରି ରୌଦ୍ର ତାପକୁ ll1ll

ସୂର୍ଯ୍ୟଙ୍କ କିରଣ ଜ୍ୱାଳାରେ ଧରା ସନ୍ତପ୍ତ ହୁଏ

ଅସହ୍ୟ ଦାବ ଦହନ ରେ  ଜଗତ କଷ୍ଟ ପାଏ ll2ll

ଆମ୍ରକୁଞ୍ଜୁ ଶୁଭେ ନାହିଁଟି  ପିକ ପଞ୍ଚମ ତାନ

ଝିଙ୍କାରୀ ବିକଟ ସ୍ଵନରେ  ଫାଟି ପଡଇ କାନ ll3ll

ଦକ୍ଷିଣ ଦିଗରୁ  ଆସଇ  ଝାଞ୍ଜି ପବନ ବହି

ଗୁଳୁଗୁଳି କରେ ବ୍ୟଥିତ  ଜନଜୀବନ ସେହି ll4ll

ନଦୀ ପୁଷ୍କରିଣୀ ନିର୍ଝର  ଜଳ ଶୂନ୍ୟ ହୁଅଇ

ବୃକ୍ଷଲତା ସବୁ ଝାଉଁଳେ  ଜଳଜୀବ କାନ୍ଦଇ ll5ll

ହତଶ୍ରୀ ଦିଶଇ ଧରଣୀ  ସବୁ ବନ ପ୍ରାନ୍ତର

ଜଳସ୍ଥଳ ପ୍ରାଣୀ ତୃଷ୍ଣାରେ ହେଇଥାନ୍ତି ଆତୁର ll6ll

ତୀକ୍ଷଣ ଶର ମାରେ ମଧ୍ୟାହ୍ନେ ସୌର ମଣ୍ଡଳ ସାଇଁ

ପ୍ରଚଣ୍ଡ ଉତ୍ତାପ ଆଘାତେ ଅଂଶୁଘାତ ହୁଅଇ ll7ll

କାଳବଇଶାଖୀ ବିଜୁଳି  ତାର ତାଣ୍ଡବ କରେ

ଅକାଳେ ଜୀବନ ନିଅଇ ଦୁଃଖ ଦିଏ ସଂସାରେ ll8ll

ଅସ୍ଥିର କରଇ ଜଗତ  କ୍ଲାନ୍ତି ଦିଏ ସଭିଙ୍କୁ

ବନାଗ୍ନି ଦହନେ ନାଶଇ ବୃକ୍ଷ ତରୁଜୀବଙ୍କୁ ll9ll

ଆମ୍ବ ତରଭୁଜ ପଣସ  ତାଳ ଖଜୁରୀ ଦେଇ

ବିଦଗ୍ଧ ପ୍ରାଣେ ଶୀତଳତା କିଛି କ୍ଷଣ ଭରଇ ll10ll

ହେନା,ମଲ୍ଲୀ, ଚମ୍ପା, ମାଳତୀ, ବଉଳ ଫୁଲ ବାସେ

ଗୁଳୁଗୁଳି ଝାଞ୍ଜି ତାତିକୁ  ସାୟଂ ପବନ ନାଶେ ll11ll

ନିରସ ତାପ କ୍ଲିଷ୍ଟ ପ୍ରାଣ ରସମୟ ହୁଅନ୍ତି

ଭାଇଚାରା ବାଣ୍ଟି ପରବ ଏ ସମୟେ ପାଳନ୍ତି ll12ll

କାକଟପୁରରେ ମଙ୍ଗଳା ଝଙ୍କଡରେ ସାରଳା

ବାଙ୍କିର ଚର୍ଚ୍ଚିକା ପୀଠରେ ଝାମୁଯାତରା ମେଳା ll13ll

ଶୀତଳ ଷଷ୍ଠି ଓ ଚନ୍ଦନ ଦୋଳ ପଣା ସଂକ୍ରାନ୍ତି

ସାବିତ୍ରୀ ଶ୍ରୀରାମ ନବମୀ ପାଳି କଷ୍ଟ ଭୁଲନ୍ତି ll14ll

ନିଷ୍ଠୁର ହେଲେବି ଗ୍ରୀଷମ ଅଟେ ଜଗତ ମିତ୍ର

ମଉସୁମୀ କରେ ଆହ୍ୱାନ ଏ ତ ଵିଧି ନିଶ୍ଚିତ ll15ll