ଗରିବ ନର

ଦୁଃଖରେ ଯାହାର, କଟେ ଦିନ ବାର

ଖାଏ ଓଳିଏ ଆହାର

ଧନ ନାହିଁ ବୋଲି , ନଚାହିଁ ଯେ ଚାଲି

ଯାଆନ୍ତି ସଭିଏଁ ଦୂର

କଣ ଗରିବ ବୋଲି ସେ ନର ll୧

ଲୋକ ଯେ ନିଜର ,ହୁଏ ସାତ ପର

ଅର୍ଥ ନାହିଁ ବୋଲି ତାର

ନ ପାରେ ପରଷି , ବୋଲି ଛେନା, ଲସି

ନ ଖାଆନ୍ତି ଗୃହେ ତାର

କଣ ଗରିବ ବୋଲି ସେ ନର ll୨

ନିର୍ଧନୀ ବୋଲି ସେ ,ପାରେନା ଦେଇସେ

ବଡ଼ ଲୋକଙ୍କୁ ଉତ୍ତର

କହିଲେ ବି ଯେତେ, କଟୁ କଥା ଯେତେ

ନଇଁ ଶୁଣେ ଶିର ତାର

କଣ ଗରିବ ବୋଲି ସେ ନର ll୩

ନାହିଁ ବୋଲି ଧନ, କରନ୍ତି ଯେ ଜନ

ତାଙ୍କୁ ଦୁରୁ ବ୍ୟବହାର

ତେଲିଆ ମୁଣ୍ଡରେ, ମାରନ୍ତି ତେଲରେ

ନଥାଏ ଦରଦ କାର

କଣ ଗରିବ ବୋଲି ସେ ନର ll୪

ସମ୍ବିଧାନେ ଅଛି, ଅଧିକାର ଅଛି

ସମାନ ଯେ ସଭିଙ୍କର

କାହିଁକି ତେବେ ଯେ ,ମିଳେନା ସହଜେ

ତାଙ୍କୁ ନାର୍ଯ୍ୟ ଅଧିକାର

କଣ ଗରିବ ବୋଲି ସେ ନର ll୫

ଲେଖା ହୋଇଅଛି ,ମାନହାନି କିଛି

ନ ପାରିବେ କରି କାର

ତାହାଲେ କାହିଁକି ,ଏମିତି ହେଉଛି

ମାନହାନି ବାର ବାର

କଣ ଗରିବ ବୋଲି ସେ ନର ll୬

ନାହିଁ କିଛି ବୋଲି, ସଭିଏଁ ଯେ ଖାଲି

କରିବେ ତାଙ୍କୁ ପ୍ରହାର

ଏପରି କରିବା ,ପାଇଁ ତାଙ୍କୁ ଅବା

କିଏ ଦେଲା ଅଧିକାର

କଣ ଗରିବ ବୋଲି ସେ ନର ll୭

ଅଛି ବୁଝିବାର, ସେ ଭାଇ ଆମର

ଧରିବା ହାତ ତାଙ୍କର

ହୀନ ଭାବନାକୁ ,କାଢି ବାହାରକୁ

କରିବା ତାଙ୍କୁ ନିଜର

"ବିଶ୍ଵ ଆମ ପରିବାର

ବିଶ୍ଵ ଆମ ପରିବାର"