ଗୃହଲକ୍ଷ୍ମୀ

ଆମ ସମାଜରେ ହିନ୍ଦୁ ପରିବାରେ

    ଅଛି ବହୁ ବିଶେଷତ୍ୱ,

ଯାହା ଅନ୍ୟ ଦେଶେ ଅବା ଅନ୍ୟ ଧର୍ମେ

    ଅଲଗା ଦର୍ଶନ ତତ୍ୱ |

ଧର୍ମ ଅନୁରାଗୀ ହିନ୍ଦୁ ପରିବାର

    ଗୃହେ କରେ ଦେବ ପୂଜା,

ମନ୍ଦିର ବି ଯାଏ ଦେବ ଦରଶନେ

    ପାର୍ବଣରେ ମୂର୍ତ୍ତି ସଜ୍ଜା |

ସ୍ୱତନ୍ତ୍ର ଭାବନା ମନେ ଭରିଥାଏ

   ପରିବାରେ ସ୍ନେହ ଶ୍ରଦ୍ଧା,

ପରସ୍ପରେ ଥାଏ ନିବିଡ଼ ବନ୍ଧନ

   ନଥାଏ ସେଥିରେ ଦ୍ଵିଧା |

ଅସରା ମମତା ପାଏ କୁଳବଧୂ

   ସତେ କି ସେ ଗୃହଲକ୍ଷ୍ମୀ,

ବଂଶର ସମ୍ମାନ ରକ୍ଷା କରେ ସିଏ 

    ହୋଇ ସ୍ୱାମୀ ଅନୁଗାମୀ |

ବ୍ୟବହାରେ ମାଖି ମଧୁର ପ୍ରଲେପ

   ସଭିଙ୍କୁ ନିଜର କରେ,

ସର୍ବ ସୁଲକ୍ଷଣୀ ହୋଇ ସବୁ କାର୍ଯ୍ୟ

   ତୁଲାଇ ଥାଏ ସୂଚାରେ |

ଶାଶୁ ଶ୍ୱଶୁରଙ୍କ ସେବାରେ ଗୁରୁତ୍ୱ

   ଗୁରୁଜନେ ଭକ୍ତି ଭାବ,

ଦେବର, ନଣନ୍ଦେ ମାତୃତ୍ୱର ଶ୍ରଦ୍ଧା

    ବାଣ୍ଟେ ରଖି ସଦଭାବ |

 ଦେବପୂଜା କରି ଥାଏ ସେ ଭକ୍ତିରେ

    ସଭିଙ୍କର ସୁଖ ଚିନ୍ତି,

ସଞ୍ଜେ ସଞ୍ଜବତୀ ତୁଳସୀ ମୂଳରେ

    ଜାଳିଥାଏ ପ୍ରୀତେ ନିତି |

ରୋଷେଇ ଶାଳାରେ ଅତି ଯତନରେ

    ଯାହା ରାନ୍ଧେ ଭଲ ଲାଗେ,

ସତେ ଅନ୍ନପୂର୍ଣ୍ଣା ବାଢି ଯେ ଦିଅନ୍ତି

    ହସି ହସି ଅନୁରାଗେ |

ଭାବନାରେ ଥାଏ ଭଲ ପାଇବାର

    ଅସରା ସୁଗୁଣ ଭରି,

ଗୃହଲକ୍ଷ୍ମୀ ହୋଇ ଜୀବନ ସାର୍ଥକ

    କରେ ସ୍ୱାର୍ଥ ତ୍ୟାଗ କରି |