ଗୋଟିଏ ନାଆର ଆମେ ତ ନାଉରୀ

ଭାରତମାତାର ଆମେ ସୁସନ୍ତାନ

ଆମେ ସର୍ବେ ଭାରତୀୟ

ଧୋଇଦିଏ ପାଦ ଜଳଧି ଉଚ୍ଛଳ

ଗୁଞ୍ଜେ ଜନଗଣ ମନ ଜୟ ।

ବୀର ପ୍ରସବିନୀ ସୁଜଳା ସୁଫଳା

ମା ଭାରତୀ ଜୟ ଗୀତି

ସବୁଜ ସୁନ୍ଦର ଅମ୍ଳାନେ ନିସ୍ୱନେ

ଗାଏ ବେଦ ଶାସ୍ତ୍ର ସ୍ତୁତି ।

କଳ କଳ ନାଦେ ତା ନଦୀ ନିର୍ଝର

ପ୍ରବହେ ଧାରା ଅମୃତ

ତାର ଯଶ ମାନ ସେବା ସମର୍ପଣେ

ସନ୍ତାନ ବୀର ପ୍ରସ୍ତୁତ ।

ସ୍ନେହ ପ୍ରେମ ମୈତ୍ରୀ ଅହିଂସା ଶାନ୍ତିର

ଉଦ୍ଘୋଷି ଜୀବନ ମନ୍ତ୍ର

ଆଗେଇବୁ ଆମେ ପ୍ରଗତିର ପଥେ

ସ୍ୱାଧୀନ ଆମେ ସ୍ୱତନ୍ତ୍ର ।

ସାର୍ବଭୌମ ଆମ ସ୍ୱରାଷ୍ଟ୍ର ଭାରତ

ଆକୁମାରୀ ହିମାଳୟ

ଗୋଟିଏ ନାଆର ଆମେ ତ ନାଉରୀ

ଅବ୍ୟର୍ଥ ଲକ୍ଷ୍ୟ ବିଜୟ ।