ଗଣତନ୍ତ୍ରର ଗଜଲ

ଜାଗରେ ଜନତା ଜାଗରେ ଜନତା

   ଜାଗି ଉଠ ତୁମେ ଆଜି ।

ତୁମେ ନ ଜାଗିଲେ ତୁମେ ନ ଉଠିଲେ

   ଚାହିଁ ଥିବ ବୋକା ସାଜି ।

ତୁମରି ଭାଇସେ ତୁମରି ସୋଦର

   ବାଛିଥିଲ ତୁମେ ତାକୁ ,

ଜନତାକୁ ଜନାର୍ଦ୍ଦନ କହି ସିଏ

   ଆସିଲେ ଭୋଟ ନେବାକୁ ।

ଭାଇ ବନ୍ଧୁ କହି ଗୋଡ ହାତ ଧରି

   ନେହୁରା ଯେ ହେଉ ଥିଲେ ,

ପାଇଗଲା ପରେ ଚୁଟିଧରି ସିଏ

   ଉଠ୍ ବସ୍ ପରା କଲେ ।

ତୁମରି ଟଙ୍କାରେ ଅୟସ କରନ୍ତି

   ରାଜ ଉଆସରେ ବସି, 

ତୁମ ପାଅ ନାହିଁ ଖଣ୍ଡେ ହେଲେ ରୁଟି

   ହଉ ପଛେ ସିଏ ବାସି ।

ମାଆର ଉନ୍ନତି ଦେଶର ଉନ୍ନତି

   ଯିଏ ଦିନେ କହୁଥିଲେ,

ଭରା ଆଲୁଅରେ ଦିନ ଦ୍ୱିପ୍ରହରେ

  ଇଜ୍ଜତକୁ ଲୁଟି ନେଲେ ।

ଭାରତର ଆତ୍ମା ଗାଁରେ ରହିଛି

   ବୋଲି କହୁଥିଲେ ଗାନ୍ଧୀ,

ଗାଁର କୃଷକ ବିଷ ପିଏ ଏଠି

   ଆପଣା ଭାଗ୍ଯକୁ ନିନ୍ଦି ।

ବହୁ ରାଷ୍ଟ୍ରୀୟ କମ୍ପାନୀ ଆଣିଲେ

   କ୍ଷୁଦ୍ର ଶିଳ୍ପ ବୁଡାଇଲେ, 

ଭବିଷ୍ଯତ ତୁମ ଅନ୍ଧକାର ଜାଣ

   ବେଉସାକୁ ଛଡାଇଲେ ।

ମୌଳିକ ଶିକ୍ଷାକୁ ଲୋପ କଲଯେବେ

   ଶିକ୍ଷିତ ବେକାରି ବଢିଲେ ।

ପେଟ ପୋଷିବାକୁ ବାଟ ନ ପାଇକି

   ଚୋରି ଡକାୟତି କଲେ ।

ଭୁଲି ଗଲେ ଗାନ୍ଧି ଆଦର୍ଶର ନୀତି

   ସତ୍ଯ ଅହିଂସାର ମନ୍ତ୍ର

ଗଣତନ୍ତ୍ରର ଗଜଲ ଗାଇ ସିଏ

   ଚଲାନ୍ତିରେ ବଂଶତନ୍ତ୍ର।