ଗଣ୍ଡଗୋଳ

କଥା କଟାକଟି ଆଖି ମିଟି ମିଟି

ତେରେଛା ବାଙ୍କ ଚାହାଁଣି

ଦାନ୍ତ କଡ଼ ମଡ ବାଣୀ ବଡ ବଡ 

ଦେଖାଇ ନାନା ଫୁଟାଣି ll

ଭାଷା ବୋଲାବୋଲି ଦ୍ରୁତ ଚାଲି ଵୁଲି

ଉତ୍ତେଜନା ଭୟଙ୍କର

ରଡି ଘଡଘଡ଼ି କମ୍ପାଇ ମହୀ ଟି

କ୍ରୋଧେ ସର୍ବେ ଗର ଗର ll

ରହ ରହ ରହ ଦେଖିବୁ ତୁ ରହ

ବଉଁଶ ଉଜାଡି ଦେବି

ତୋର ସର୍ବ ନାଶ କରିବି ମୁଁ ଧ୍ବଂସ 

ନାଲି କୋଠା ଦେଖାଇବି ll

ଦେବି ଗୋଟେ ପିଟି ମୁଣ୍ଡ ଯିବ ଫାଟି

ପଡ଼ିବୁ ଦାନ୍ତ ନିକୁଟି

ତୋର ଜନ୍ମଦିନ  ପଡ଼ିଯିବ ମନ

କରିଦେବି ତୋତେ ମାଟି ll

ବଡ଼ିମା ଦେଖାନା କଥା ତୁ କହନା 

ଲଢ଼ିକି ଦେଖା ରସିକା

ତୋର ହାତ ଗୋଡ଼ ଭାଙ୍ଗିଦେବି ହାଡ଼ 

କୁକୁଡ଼ା ପରି ମୋଡ଼ିକା ll

ଲଗାଇଲୁ ନିଆଁ ହେବୁ ତୁ ଛାନିଆଁ

ପୁଅଟା ଯଦି ବାପାର 

ଲଗା ତୁ ହାତ ଟା ମୁଇଁଯେ ଷଣ୍ଢଟା

ଚକଟି ଦେବି ଶରୀର ll

ଧରି ଭୀମରୂପ ଭୈରବ ସଦୃଶ

ପରି ଯୁଦ୍ଧ କୁରୁ କ୍ଷେତ୍ର

ଭୀମ ଦୁଃଶାସନ କରନ ଅର୍ଜୁନ

ଏକ ଠୁ ଆନ ବୃହତ ll

ଧରି ଗଡ଼ାଗଡି ଘୋଷଡ଼ା ଘୋଷଡ଼ି

ହୋଇ କାମୁଡା କାମୁଡି

ମୁଥ ମରାମରି ଧରିକି ଖପୁରି

ହୋନ୍ତି ରାମ୍ପୁଡା ରାମ୍ପୁଡ଼ି ll

ଖଣ୍ଡିଆ ଖାବରା ହୋଇ ଦରମରା

ଥାନା ଫାଣ୍ଡି ଶେଷ ସ୍ଥଳ 

ଧରି କୁଜିନେତା ଦୁଃସହ୍ୟ ଅବସ୍ଥା

ଲାଞ୍ଚ ଗୁଞ୍ଜା ମାରି ତେଲ ll

କଥା ବୁଝାମଣା ନାମେଯେ ବାହାନା

ରାଜନୀତି ପ୍ରିୟାପ୍ରିତି

ନ୍ୟାୟ ଯେ ମିଳେନା ମିଳେ ପ୍ରତାରଣା

ଦୃଢ଼ ହୁଏ ଅନୁଭୂତି ll

କାନକୁ ଆଉଁସି କାନ୍ଦୁଥାଏ ବସି

ଶାଗୁଣା ବୈଦ୍ୟ ଶବର 

ହରାଇ ଇଜ୍ଜତ ଧରି ଗୋଡ଼ ହାତ

ପାଇଲି ଫଳ କଳିର ll

ଗଣ୍ଡଗୋଳ ଫଳ  କରିବ ଦୁର୍ବଳ

ଯନ୍ତ୍ରଣା ମିଳେ ଉଦାସେ 

ପଛେ ମାଡ଼ ଖାଇ ନୀରବ ରହିବି

ନ ଯିବି ଆଇନି ପାଶେ ll