ବସ୍ତି ବାସିନ୍ଦା କି ଗାଈ ଗୋରୁ!

ଏ ଘୋର ସଙ୍କଟେ ଏ କି' କଲ,

ବସ୍ତି ଭାଙ୍ଗି କିସ ଯଶ ନେଲ;

ଥଇଥାନ ପାଇଁ କଟକଣା,

ଏଠି କାହିଁ ହୁଏ ବାଟବଣା?

ତାଲାବନ୍ଦୀ ବେଳେ ତଡି ଦେଇ,

କୋଭିଡ ନିୟମ ଭୁଲି ଯାଇ;

ଏକଇ କୁଟୀରେ ରଖି ତାରେ,

ଭୁଲିଲ କି, ସଂକ୍ରମଣ ବାରେ?

ବଢେ ନିତି ଯହିଁ ସଂକ୍ରମଣ,

ସେ'କାଳେ କିମ୍ପାଇଁ କଲ ମଣ;

କଟକ ନଗର ମହାପୁରୁ,

ବସ୍ତି ବାସିନ୍ଦା କି ଗାଈ ଗୋରୁ!

ଭୁଲିଗଲ ସାମାଜିକ ଦୂର,

କମିବ କି? ସଂକ୍ରମଣ ହାର;

ସବୁରି ପାଇଁ ଯେ ଏକ ନୀତି,

ତେବେ ଏଠି କାହିଁ ଭ୍ରମ ମତି?

ଆଜି ଯାଏଁ କାହିଁ ଥିଲ ବସି,

ତାଲାବନ୍ଦୀ କାଳେ ଏଠି ଆସି;

ଦେଲ ତାରେ କ୍ଳେଶ ଏ ସଙ୍କଟେ,

ଭାଳିଛ କି,ଏଠି କିସ ଘଟେ?

ମହାମାରୀ ସାଥେ ଗ୍ରୀଷ୍ମ ତାପ,

ତା'ସାଥେ ପ୍ରକୃତି କରେ କୋପ;

ଏମନ୍ତ ଯାତନା ବଢେ ଯହିଁ,

କେ' ହୋଇବ ସାହା କୁହ ସାଇଁ?

ନୀତି କହେ ଆଗେ ଥଇଥାନ,

ତା'ପରେ ଉଛେଦ ବସ୍ତି ଜାଣ;

ଏଠି ତେବେ କାହିଁ ବ୍ୟତିକ୍ରମ,

କହିବ କି? ଅଧିକାରୀ ଆମ।

ଏକ ପକ୍ଷେ ଛାଡି ଭିଟାମାଟି,

ଅସ୍ଥାୟୀ କୁଟୀରେ ରହି ଏଠି;

ମାନସିକ ସ୍ଥିତି ହେବ କିସ,

ବଢି ଯିବ ନିଶ୍ଚେ ତାର କ୍ଳେଶ।

ମଣିଷ ପଣିଆ ବାରେ ଭାଳି, 

ନରେ ଦେଖ ତିଳେ ନର ଭଳି;

ପଶୁ ପକ୍ଷୀ ଯହିଁ ପାଏ ମାନ,

ମାନବ କିମ୍ପାଇଁ ଏତେ ହୀନ?