ଘଟଣା
ଘଟଣା
ଜୀବନରେ ଆସେ ଅନେକ ଘଟଣା
ଆଖିରେ ସେ ରହି ଥାଏ
ଯେତେ ଦୂରେ ଯିଏ ଚାଲି ଯାଉ ପଛେ
ହୃଦୟରେ ଥାଏ ସିଏ ।
ନା ଭୁଲି ହୁଏ ସେ ଅତୀତ କାହାଣୀ
ଅତୀତର ସେ ଘଟଣା
ଚଲା ପଥେ କେବେ କଣ୍ଟା ଫୁଲ ଝରେ
ହୁଏ କେବେ ବାଟ ବଣା ।
ସେ ବାଟ ବଣାରେ ଘଟି ଯାଇଥାଏ
ଏମିତି ଅନେକ ସ୍ମୃତି
କେତେକ ଘଟଣା ଆପେ ଭୁଲି ହୁଏ
କେତେ ଯେ ହୁଏନା ଇତି ।
ପ୍ରତ୍ୟେକ ଘଟଣା ମନ ହୃଦୟରେ
ଛାପି ହେଇ ରହି ଯାଏ
ସେଇ ତ ଘଟଣା ଚଲାପଥ ଧାରା
ଆପେ ବଦଳାଇ ଦିଏ ।
ଗାଆଁ ଠୁ ସହର ପଲ୍ଲୀଠୁ ନଗର
ଘଟଣାରେ ଭରପୂର
ପ୍ରତି ଘରେ ଘରେ ଅନେକ ଘଟଣା
ଘଟି ଥାଏ ନିରନ୍ତର ।
ଜୀବନର ଚଲା ପଥ ଭାଗ୍ୟକାଶେ
ଅନେକ ଘଟଣା ଘଟେ
କେବେ ସେ ଘଟଣା ସମ୍ପର୍କ ଗଢଇ
କେବେ ତ ସମ୍ପର୍କ ତୁଟେ ।
ଏମିତି ଅନେକ ଘଟଣାଟି ଥାଏ
ଯାଏ ସେ ଅଲିଭା ହେଇ
କେବେ ଭରି ଦିଏ ଜୀବନରେ ଖୁସି
କେବେ ଲୁହେ ଦିଏ ଧୋଇ ।
ଜୀବନର ଗତି ମୋଡ ବଦଳାଏ
ଜୀବନେ ବିତୃଷ୍ଣା ଭରେ
ସେଇ ବିତୃଷ୍ଣାଟେ ଏତେ ଦୁଃଖ ଦିଏ
ପାଦ ରହି ଥାଏ ଦୂରେ ।
ଅନେକ ଘଟଣା ଭଲ ସମ୍ପର୍କରେ
ଫାଟ ସୃଷ୍ଟି କରି ଦିଏ
ସେଇ ଘଟଣାବି କେବେ ପୁଣି କାହା
ଜୀବନ ପାଲଟି ଥାଏ ।