ଗଢିବାର ଅଛି ଗନ୍ଧମାର୍ଦ୍ଧନ

ଯୁଦ୍ଧ ଏ ଭୂମିରେ ଶଙ୍ଖ ଫୁଙ୍କିଲାଣି 

ବୀର ଭୂମି ଖୋଜେ ରକ୍ତ

ଧର୍ମ ଚିତ୍କାରୁଛି ତ୍ରାହି ତ୍ରାହି ବୋଲି

ଅଧର୍ମ ହୋଇଛି ଶକ୍ତ l

ସ୍ଥାନ କାଳ ପାତ୍ର ଚୟନ ସରିଛି

ବିଷ ଦେହେ ଭେଦି ନାହିଁ

ଚେତାଶୂନ୍ୟ ସ୍ଥିତି ଏଯାଏଁ ଆସିନି

ଚିନ୍ତା ତେଣୁ କା'ର କାହିଁ ?

ଉଠ ଦେଖ ବାରେ ଇତିହାସ ଯୁଦ୍ଧ

ସଂକଳ୍ପ ଧରି ମନରେ

ଗର୍ଜନ କର ସେନା ଟିଏ ସାଜି

ରାଷ୍ଟ୍ର ଗଠନ ପଥରେ l

ବେଳ ଥାଉ ଥାଉ ଜାଗ ହେ ପ୍ରହରୀ

ଅନ୍ଧାରକୁ ଚିରି ଦେଇ

ମନ ତରବାରି ତୀକ୍ଷ୍ଣ କରି ଗଢ଼

ମେରୁ ଶୃଙ୍ଗ ଯିବେ ଶୋଇ l 

ସେନା ଚରିତ୍ରରେ ପଡ଼ିଅଛି ପାଳି

ସୀତାମାତା ରକ୍ଷା ପାଇଁ

ଗଲେ ଯାଉ ପଛେ ଏ ଜନ୍ମ ଜୀବନ

କାୟା ମାୟା ଡର ନାହିଁ ll

ଗଢିବାର ଅଛି ଗନ୍ଧମାର୍ଦ୍ଧନ

ମୃତ୍ୟୁ ସଞ୍ଜିବନୀ ଖଞ୍ଜି

ଦେଖିବାର ଅଛି ସାତ ସମୁଦ୍ରକୁ 

କିଏ ଯାଉଅଛି ଲଙ୍ଘି ?

ପାପର ପ୍ରଶୟ ଦେଇଅଛ ଯେବେ

ସତ୍ୟ ବି ଗଢ଼ିବ ତୁମେ

ରକ୍ତ ଛିଟା ଶବ ଦେଖିକି ଜିଣିବ

ଏହି ପୂଣ୍ୟର ଧାମେ ll