#Free India
#Free India
"ଆମେ ଓ ଆମ ପ୍ରଗତି"
ଏକବିଂଶ ଶତାବ୍ଦୀ ର ଏକ ପଞ୍ଚମାଂଶ
ବିତେଇ ଦେଲେଣି ଆମେ,
ସଭିଙ୍କ ମତରେ ପ୍ରଗତି ପଥରେ
ଆଗେଇ ଚାଲିଛେ ଆମେ |
କେତେ କୋଠାବାଡି କଳ କାରଖାନା
ଗଢି ଯେ ଉଠିଛି ଦେଶେ,
କେତେ ରାଜପଥ ଆଲୋକେ ସଜ୍ଜିତ
ଗ୍ରାମପଥ ଶୋଭା ଦିଶେ |
ବିଦ୍ୟାଳୟଠାରୁ ବିଶ୍ୱବିଦ୍ୟାଳୟ
ପାଠପଢାପାଇଁ ଖୋଲା,
ଡାକ୍ତରଖାନା ଯେ ସବୁଠାରେ ଠିଆ
ରୋଗୀସେବା ପାଇଁ ହେଲା |
ବୈଷୟିକ କ୍ଷେତ୍ରେ ଆଗେଇଛେ ସତ
ମଣିଷପଣିଆ ହାନୀ,
ବିବେକ ଆମର ନିଃଶେଷ ହେଲାଣି
ଆମେ ପାରୁନାହୁଁ ଜାଣି |
ଶୋଷଣ କଷଣ କାୟା ବଢ଼ାଇଛି
ପ୍ରତିକ୍ଷେତ୍ରେ ବିଭୀଷିକା,
ହିଂସା ଦ୍ୱେଷ ଭାବ ବଢ଼ିତ ଚାଲିଛି
ମନେ ଭରେ ଅହମିକା |
ଚଉସ୍ତରୀ ବର୍ଷ ବିତି ସାରିଲାଣି
ସ୍ୱାଧୀନତା ପରେ ପରେ,
ନାରୀଟିଏ ଆଜି ନୁହେଁ ସୁରକ୍ଷିତା
ଯିବାପାଇଁ ଏକା ଦୂରେ |
ପ୍ରତିଦିନ ହତ୍ୟା କେତେ ବ୍ୟଭିଚାର
କେତେ ଲୁଣ୍ଠନ ଚାଲେ,
ଜୀବନ ହେଲାଣି ଦୁର୍ବିସହ ଆଜି
ବଞ୍ଚିନାହିଁ କେହି ଭଲେ |
ନୂଆନୂଆ ସବୁ ଆଇନ ହେଉଛି
ସବୁଥିରେ ଗଳାବାଟ,
ଖୁଦ କଣିକାରେ ସନ୍ତୋଷ ଲଭୁଛି
ପାଇ ନିମ୍ନ ମଧ୍ୟବିତ୍ତ |
ପୁଞ୍ଜିବାଦ ଆଜି ସଗର୍ବେ ଚାଲିଛି
ଗଣତନ୍ତ୍ର ଗଳା ଶୁଖେ,
ବୁଝିନ୍ତିନି କେହି ପ୍ରକୃତ କାରଣ
ନିଜେ ସୁଖୀ ନିଜ ସୁଖେ |
ଏମିତି ଚାଲିବ ଯେତେଦିନ ଯାଏ
ନବୁଝିବା ଯାଏ ଲୋକେ,
ଫୁଟପାଥ ପରେ ନରକ ଯନ୍ତ୍ରଣା
ଗରୀବ ଶୋଇବ ଭୋକେ |
ଇତିହାସ କହେ ସମାଜ ଏମିତି
ସମୟେ ପରିବର୍ତ୍ତନ,
ସେଥିପାଇଁ ଲୋଡ଼ା ଜନ ସଚେତନ
ଆଉ ଏକ ଆନ୍ଦୋଳନ |