ଏଣ୍ଡୁରି ପିଠାରେ ପୁରିଅଛି ଘର

ଏଣ୍ଡୁରି ପିଠାରେ ପୂରି ଅଛି ଘର

ମହ ମହ ବାସୁଅଛି

ମାମୁଁ ଘରୁ ଆସେ ଅଷ୍ଟମୀ ବେଭାର

ମନ ଖୁସିରେ ଡେଉଁଛି ।

ପଡୁଆଁ ପିଲାର ପାଇଁ ମାମୁଁ ଘରୁ

ନବ ବସ୍ତ୍ର ଆସି ଅଛି

ହଳଦୀ ପତରେ ପିଠା ହେଇ ଅଛି

ବାସ ତା ଚହଟୁ ଅଛି ।

ଅରୁଆ ଚାଉଳ, ବିରି, ସୁଜି, ଚିନି

ତେଲ, ବେସନ ଆସିଛି

ମୁଢି ସାଥେ ପୁଣି ନଡିଆ ଆସିଛି

କେତେ ଖୁସି ଲାଗୁ ଅଛି ।

ନୂଆ ବସ୍ତ୍ର ପିନ୍ଧି ପଡୁଆଁ ପୁଅଟି

ମନ ଖୁସିରେ ବସିଛି

ମଥାରେ ଚନ୍ଦନ ଟୋପାକୁ ଲଗେଇ

ସଜେଇ ହେଇ ବସିଛି ।

ପରିବାର ମଧ୍ୟେ ସ୍ନେହ ମମତାର 

ଖୁସିର ସୁଅ ଛୁଟୁଛି

ଏକାଠି ବସିଣ ମାଜା ତାମସାରେ

ଏଣ୍ଡୁରି ଖିଆ ଚାଲିଛି ।

ଏଣ୍ଡୁରି ପିଠାରେ ପୁର ପଡିଅଛି

କେତେ ସ୍ବାଦ ଲାଗୁଅଛି

ହଳଦୀ ପତର ଏଣ୍ଡୁରି ପିଠାଟି

ମହ ମହ ବାସୁ ଅଛି ।

ଓଡିଆ ସଂସ୍କୃତି ପରମ୍ପରା ବିଧି

କିଏ ବା ଭୁଲି ପାରିଛି

ବରଷକୁ ଥରେ ଏଣ୍ଡୁରି ପିଠାର

ସ୍ବାଦଟି ବାରି ପଡୁଛି ।

ମାର୍ଗଶିର ମାସ କୃଷ୍ଣ ଅଷ୍ଟମୀରେ

ପ୍ରଥମାଷ୍ଟମୀ ପଡୁଛି

ଏଣ୍ଡୁରି ପିଠାଟି ହୁଏ ଏ ପର୍ବରେ

ସେ ସ୍ବାଦ ନିଆରା ଅଛି ।