ଏମିତି ସେ ବହ୍ନି

ଏମିତି ସେ ବହ୍ନି

ନା ଶିଖା ଉଠେ ନା ଉଠେ ଝାସ

ନା ଦେଖି ହୁଏ ନା ଉଠେ ତାପ ।

ଏମିତି ସେ ଅନଳ

ବଣିଆର ଫୁଙ୍କନଳୀ ଶିଖା ପରି

ଅଶୁଦ୍ଧ ସୁନାକୁ ବିଶୁଦ୍ଧ କଲାପରି

ଜୀବନକୁ ଆଉଟି

ଦେଇଥାଏ ନୂଆରୂପ ।

ଏମିତି ସେ ଦାବାନଳ

ଜୀବନର ଚଲାପଥେ

କେବେ କେବେ ଜଣା

ଅବା ଅଜଣାରେ

କିଛି ଭୁଲ ହୋଇଗଲେ

ଗ୍ରାସକରେ ବିବେକକୁ

ତା' ଅଦୃଶ୍ୟ ଶିଖାରେ

ଅନୁଶୋଚନାର ବାଟକୁ କଢାଇ

ଆଣିଦିଏ ଆନନ୍ଦ ଅମାପ ।

ଏମିତି ସେ ଅଗ୍ନି

ସଦାବେଳେ ସୁପଥ ଦେଖାଏ

ଜୀବନର ଚଲାପଥ କରେ କୁସୁମିତ

କ୍ଷମାର ଗୁଣରେ କରେ ବିଭୂଷିତ

ଭୂଲ୍ ମଣିଷ ମନରେ

ଆଣେ ପଶ୍ଚାତାପ ।

ଏମିତି ସେ ନିଆଁ

ବେଳେ ବେଳେ ଜୀବନକୁ

ଜାଳିପୋଡି କରେ ଛାରଖାର

ନା ଦାଗ ଦିଶେ

ନା ଦାଗ ଲିଭେ

ଲିଭିଥାଏ ମଶାଣି ଜୂଇରେ

ଏମିତି ସେ ବହ୍ନି

ଅଟେ ଅନୁତାପ।