ଏମାନଙ୍କୁ ନିଶ୍ଚେ ଦଇବ ଦଣ୍ଡେ

ରାଣ୍ଡ ହୋଇ ଯେହୁ ଦେହକୁ ମଣ୍ଡେ

ମିଛ କହି ଯିଏ ନାରୀକୁ ଭଣ୍ଡେ |

ଗେରସ୍ତ ହୋଇ ଯେ ମାଇପେ ଦଣ୍ଡେ

ଲୁଚିକରି ପର ନାରୀକୁ ଉଣ୍ଡେ |

ତୁଚ୍ଛା କଥାରେ ଯେ ଭାଇକୁ ଦଣ୍ଡେ

ଦେବି ଦେବି କହି ନିଇତି ଭଣ୍ଡେ |

ପାଇଲା ଗାଡ଼ିଆ ନିତି ଦରାଣ୍ଡେ

ଦୋଷ ଲଦେ ଯିଏ ନିର୍ଦ୍ଦୋଷ ମୁଣ୍ଡେ |

ହିଂସା ଆଚରେ ଯେ ଅପର ପିଣ୍ଡେ 

ବାଡ଼ ବତା ନାହିଁ ଯାହାର ତୁଣ୍ଡେ |

ସାଧୁ ବେଶେ ଯିଏ ଜଗତ ଭଣ୍ଡେ

ସଭାକୁ ବିଗାଡ଼େ ବାକ ବିତଣ୍ଡେ |

ଗୁରୁ ଗୁରୁଜନେ ଧିକ୍କାରେ ଚାଣ୍ଡେ 

ସୀମା ହାଣେ ଧରି କୋଡ଼ି ଚାଖଣ୍ଡେ |

ଚୋରା ଦରବରେ ଘରକୁ ମଣ୍ଡେ

ନିଜ ଘର ଗୋଇ ପ୍ରକାଶେ ଦାଣ୍ଡେ |

ପତି ଥାଉଁ ପରପୁରୁଷେ ଉଣ୍ଡେ

ଦାଉ ସାଧେ ଯିଏ ନିର୍ଜୀଵ ପିଣ୍ଡେ |

ବିଚାରକ ଯଦି ବିଚାରେ ଭଣ୍ଡେ

ଓଜନରେ ଠକେ ଯେ ତୁଳାଦଣ୍ଡେ |

ହରିନାମ କେବେ ନନିଏ ତୁଣ୍ଡେ

ଉପକାରୀ ଜନେ ଯେ ଭଣ୍ଡ ଦଣ୍ଡେ |

ଏ ଦ୍ଵାବିଂଶ ପାପୀ ଗଣା ବ୍ରହ୍ମାଣ୍ଡେ 

ଏମାନଙ୍କୁ ନିଶ୍ଚେ ଦଇବ ଦଣ୍ଡେ |