ଏଲିଏନ
ଏଲିଏନ
ବିଶାଳ ଜଗତ ସର୍ଜିଲେ ଈଶ୍ୱର,
ସ୍ୱର୍ଗ ମର୍ତ୍ତ୍ୟ ପାତାଳ ଶୂନ୍ୟ ଅମ୍ବର l
ସୌର ପରିବାର ରବି ନବଗ୍ରହ,
ଉପଗ୍ରହାଦିରେ ହୋଇଅଛି ଥୟ l
ପୃଥିବୀ ପୃଷ୍ଠରେ ଜୀବ ଅବସ୍ଥିତି,
ମଙ୍ଗଳେ ସୂଚନା ଜୀବର ସଂସ୍ଥିତି l
ରହସ୍ୟ ଭେଦିବା ନର ଚେଷ୍ଟାରତ,
ସୀମିତ ଜ୍ଞାନ ଯେ ସାଗର ବ୍ୟାପତ l
ବିଭିନ୍ନ ଲୋକ ମଣ୍ଡଳେ ରହି ସତ୍ୟ,
ଦେବ ଯକ୍ଷ ରକ୍ଷ ଅଶରୀରୀ ତତ୍ତ୍ୱ l
ଅବିନାଶୀ ଆତ୍ମା ଭ୍ରମେ ଗ୍ରହାନ୍ତର,
ଭୁବ ଲୋକେ ଅନ୍ତରୀକ୍ଷେ ସମ୍ରାଜ୍ୟର l
ପୃଥ୍ଵୀ ପ୍ରତି ମାୟା ତାଙ୍କ ଅସରନ୍ତି,
ପାଇଲେ ସୁଯୋଗ ଓହ୍ଲାଇ ଆସନ୍ତି l
ଦେଖନ୍ତି ସବୁ ଯେ ସୂକ୍ଷ୍ମ ସ୍ୱରୂପରେ,
ଅଦୃଶ୍ୟ ଦୃଶ୍ୟ ନିଜେ ନୁହେଁ ଅପରେ l
ୟାଙ୍କୁ ଧରି ଛୁଇଁ ବାନ୍ଧି ହୁଏ ନାହିଁ,
ଛାୟା ସମ ବେଳେ କାୟା ଦୃଶ୍ୟ ଥାଇ l
କାଷ୍ଠ ଲୌହ ପାଷାଣ ପ୍ଲାଷ୍ଟିକ ଭେଦି,
ସାତ ତାଲା ଗୃହେ ସେ ଅନ୍ତରଭେଦୀ l
ଭିନ୍ନ ଭିନ୍ନ ବେଶେ ପାରନ୍ତି ଧାରଣ,
ଭାଗ୍ୟ ଥିଲେ ୟାଙ୍କୁ ମିଳଇ ଦର୍ଶନ l
ଶତ୍ରୁ ନୁହେଁ ସେହି ଭୟ କରୁନାହିଁ,
ଅନ୍ୟ ଗ୍ରହବାସୀ ଏଲିଏନ ସେହି l
କୌତୂହଳେ କ'ଣ ଏଠାକୁ ଆସିଣ,
ଆସିବା ୟାଙ୍କର ନୁହେଁ ଅକାରଣ l
ପ୍ରତ୍ୟକ୍ଷ ଘଟିଥାଏ ତ ଦିବସରେ,
ଘନକୁହୁଡ଼ି ଆଚ୍ଛନ୍ନ ବାହାରେ l
ଘନକୁହୁଡ଼ିଭରା ପରିବେଶର,
ନଡ଼ିଆଗଛୁ ବାହାରି ଉଡ଼ିବାର l
ପିଲାଏ ଦେଖନ୍ତି ଦୃଶ୍ୟ ଆଚମ୍ବିତ,
ପାଟି କରି ଡାକ ସଭିଙ୍କୁ ତ୍ୱରିତ l