ଏଇ ମୋର ଗାଆଁ କି ସୁନ୍ଦର ଆହା

       ଏଠି ଅଛି ଖେଳ ଛାଇଆଲୁଅର

              ପ୍ରକୃତିରାଣୀର ଶୋଭା

       ଅଛି ଫୁଲଫୁଟା ସକାଳ ଓ ସଞ୍ଜ

              ଦିଶେ ଯାହା ମନଲୋଭା ।

       ଏଠି ଅଛି ରାବ କୁକୁଡ଼ାର କଅ

              ଡାମରାକାଉର କାଆ

       ଅଛି ଏଠି ଋତୁ ଛବିଳ ବସନ୍ତ

              ଚୋରା ଚଇତାଳି ବାଆ ।

       ଏଠି ଅଛି ମାଇଁ, ମଉସା,ମାଉସୀ

              ମାଆ,ଦାଦା, ଖୁଡ଼ୀ ଡାକ

       ସେନେହ, ଶରଧା,ସରାଗ,ମମତା

              ଅଛି ଏଠି ଥାକ ଥାକ ।

       ଏଠି ଅଛି କଙ୍କି, ରୂପା ପ୍ରଜାପତି

              କୋଇଲିର କୁହୁ ଗୀତ

       ଅଛି ଏଠି ମିଠା କାଳିଗାଈ କ୍ଷୀର

              ଦେହ ପାଇଁ ଯାହା ହିତ ।

       ଅଛି ଝିଙ୍କାରୀର ଝିଇଁ ଝିଇଁ ତାନ

              ମହୁମାଛି ଗୁଣୁଗୁଣୁ

       ବଂଶୀସ୍ବନ ଅଛି ବାଉଁଶବଣର

              ନିଦ ଆସେ ଶୁଣୁ ଶୁଣୁ ।

       ଅଛି କିଆବୁଦା ବିଲୁଆର ରଡ଼ି

              ହନୁମାଙ୍କଡ଼ର ଖେଳ

       ସାରୁବୁଦା ମୂଳେ ଅଛି ବରଷାରେ

              ବେଙ୍ଗବେଙ୍ଗୁଲୀର ମେଳ ।

       ଶାଗ ପଖାଳର ମଜା ଅଛି ଏଠି

              ଖରାଦିନ ଖରାବେଳେ

       ଅଛି ଏଠି ଖୁସି କୁଆଁରୀ ଝିଅଙ୍କ

              ବୋହୂଚୋରି ପୁଚିଖେଳେ ।

       ଏଠି ଅଛି ଧାରା ଶ୍ରାବଣ ସୁଅରେ

              କାଗଜଡଙ୍ଗାର ଧାଡ଼ି

       ଅଛି ଏଠି ଆଈ ଅଛନ୍ତି ବି ଅଜା

              ଅଜାଙ୍କ ବଙ୍କୁଲୀ ବାଡ଼ି ।

       ଏଠି ଅଛି ପିଠା ପୂନେଇଁ ପରବ

              ଅଛି ରଜଦୋଳି ଖେଳ

       ଅଛି ଦିଆନିଆ ଭାଇ ଭାଇ ଭାବ

              ସାଙ୍ଗ-ସୁଖ ପାଇଁ ବେଳ ।

       ଅଛନ୍ତି ଏଠି ମା' ଝାଡ଼ିଦେବେ ଧୂଳି

              ପୋଛିଦେବେ ଆଖିଲୁହ

       ଏଇ ମୋର ଗାଆଁ କି ସୁନ୍ଦର ଆହା

              ଯିବି ଛାଡ଼ି କିଆଁ କୁହ ।