ଏଇ ଅଳି ତୁମ ପାଶେ

ଜାଳିଲି ଦୀପାଳି ଭକ୍ତି ପୁଷ୍ପାଞ୍ଜଳି

ଅରପିଲି ଶ୍ରୀପୟରେ,

ଗରୁଡ଼ ପଛରେ ଅନେଇ ରହିଲି

ଡାକିବୁ ବୋଲି ଆଦରେ |

ଚକାନୟନରେ ଲାଖିଗଲା ଆଖି

ଦୁଃଖ ଭୁଲିଲି ଅଚିରେ,

ନୟନୁଁ ଲୋତକ ନିଗିଡି ଆସିଲା

ଚିବୁକର ଦୁଇ ଧାରେ |

କାଳିଆ ଧନକୁ ଦେଖିଲି ନିରେଖି

ମନ ମୋ ଭରିଲା ନାହିଁ,

ପଛକୁ ଫେରିବା କଷ୍ଟ ଲାଗିଲାରେ

ତୋବିନା ପାରେନା ଜିଇଁ |

ଏତେ କପଟିଆ ବଡ଼ ଦଗାଦିଆ

ମାୟା ମୋହନରେ ତୁହି,

ମୋ ମନରେ ଯାହା ମନସ୍କାମ ଥିଲା

କ୍ଷଣିକେ ଦେଲୁ ଭୁଲେଇ |

ଶ୍ରୀଚରଣ ବିନା କିଛି ମୁଁ ଚାହେଁନା

ପାଇବାକୁ ଟିକେ ସ୍ଥାନ,

ତୋ କଳାବଦନ ଦର୍ଶନ ପାଇଁକି

ବିତିଛି ମୋ କେତେ ଜନ୍ମ |

ଏ ଜୀବନ ମୋର ସଫଳ କରିଦେ

ତୋ ଭାବରେ ମୋତେ ବାନ୍ଧି,

ଅନ୍ତରୁ କାଢିନେ ମାୟା ଆବରଣ

ତୋ ପ୍ରେମରେ କର ବନ୍ଦୀ |

ତୋ ନାମକୁ କରି ଜପାମାଳି ଧନ

ସ୍ୱଛ କରିବି ଶରୀର,

ଶେଷ ସମୟରେ ତୋ ସ୍ୱରୂପ ଦେଖି

ପହଂଚିବି ମୋକ୍ଷଦ୍ୱାର |

ସାଦରେ ପାଛୋଟି ନେବୁରେ କାଳିଆ

ରହିଲା ତୋତେ ମୋ ରାଣ,

ଦାସିଟିଏ କରି ରଖିବୁ ପାଖରେ

ତୋ ପଦେ ନେଲି ଶରଣ |