ଏ ଯୁଗର ଶ୍ରବଣକୁମାର
ଏ ଯୁଗର ଶ୍ରବଣକୁମାର
ଶ୍ରବଣକୁମାର ଚରିତ ରାମାୟଣେ ଝଙ୍କୃତ
ପିତା ମାତାଙ୍କର ସେବାରେ ସଦା ଉତ୍ସର୍ଗୀକୃତ |
କଳିଯୁଗେ ମଧ୍ୟ ଅଛନ୍ତି ପୁତ୍ର ଶ୍ରବଣ ସମ
ଯାହାଙ୍କ ଚରିତ୍ର ଉତ୍ତମ ଗୁଣ କି ଅନୁପମ |
ଗରିବ ଘରର ପୁଅ ସେ ନାମ ମଧୁସୂଦନ
ପିତା ଦାଶରଥୀ ଜନନୀ ଜୟା ପ୍ରିୟ ନନ୍ଦନ |
ମୂଲ ଲାଗି ପିତା ଚଳାନ୍ତି ସୁଖେ ଘର ସଂସାର
ଦୁଃଖ ଦରିଆରେ ସୁଖର ପୋତ ପୁତ୍ର ସୁଧାର |
ପାଠରେ ଶାଠରେ ଧୂରୀଣ ଥିଲା ମଧୁସୂଦନ
କ୍ରୀଡା କସରତ, ସଂଗୀତ ନୃତ୍ୟେ ଅଭିନନ୍ଦନ |
ମାତା ପକ୍ଷାଘାତେ ପୀଡିତା ହେଲେ ଶଯ୍ୟାଶାୟିତ
ଅର୍ଥ ଚିନ୍ତା ଋଣ ଯନ୍ତାରେ ପିତା ହେଲେ ମନ୍ଥିତ |
ଶ୍ୱାସ ରୋଗ ଗ୍ରାସେ ପ୍ରବଳ ହରାଇଲେ ସାମର୍ଥ୍ୟ
ଧୈର୍ଯ୍ୟ ଧରି ମଧୁ ଚଳାଏ କଷ୍ଟେ ସଂସାର ରଥ |
ପିତା ମାତା ସେବା ଶୁଶ୍ରୁଷା ଅର୍ଥେ ନିବେଶି ମନ
ସ୍ନାତକ ଅଧାରୁ ଛାଡ଼ିଲା ରହେ ନିଜ ସଦନ |
ଟିଉସନ କରେ ପିଲାଙ୍କୁ ବିଲେ ଖଟଇ ଯାଇ
ପିତୃ ମାତୃ ଭକ୍ତି ତାହାର କାହିଁ ତୁଳନା ନାହିଁ |
ପିତା ଧର୍ମ ପିତା ପରମ ପିତା ସ୍ଵର୍ଗାପବର୍ଗ
ଆକାଶଠାରୁ ସେ ବିଶାଳ ଶ୍ରୁତି ଶାସ୍ତ୍ର ପ୍ରସଂଗ |
ମାତା ସର୍ବଂସହା ଧରିତ୍ରୀ ତୁଷ୍ଟି ପୁଷ୍ଟି କାରିଣୀ
ସନ୍ତାନ ପାଇଁକି ବାତ୍ସଲ୍ୟ ରସ ପ୍ରତିପାଦିନୀ |
ଦୁହିଁଙ୍କ ପ୍ରସାଦୁ ମଧୁକୁ ମିଳିଗଲା ଚାକିରୀ
ସଚିବାଳୟର କିରାଣୀ ବଢ଼ିଗଲା ଖାତିରି |
ଘର ଭଡ଼ା ନେଇ ରଖିଲା ମାତା ପିତାଙ୍କୁ ତହିଁ
ଅନୁଭବ କଲା ସେବାରେ ଊଣା ଯାଉଛି ରହି |
ଘରକୁ ଆଣିଲା ଘରଣି ଯାର ନାମ ମାଧବୀ
ଗରିବ ଘରର ଝିଅସେ ସତୀ ସ୍ବାଧୀ ସାଧବୀ |
ପତିବ୍ରତା ପତି ପଦାଙ୍କ କରେ ଅନୁସରଣ
ଶାଶୁ ଶ୍ୱଶୁରଙ୍କ ସେବାରେ ଖଟେ ସେ ଅନୁକ୍ଷଣ |
ଉତ୍ତମ ଚିକିତ୍ସା ଲଭନ୍ତେ ସ୍ୱାସ୍ଥ୍ୟ ଗଲା ବଦଳି
ଧିରେ ଧିରେ ଶାଶୁ ଚାଲିଲେ ଆଶା ବାଡ଼ି ଆଦରି |
ଶ୍ୱାସ କାଶ ଧିରେ କମିଲା ଦାଶରଥୀ ସାନନ୍ଦ
ଅମୀୟ କଲ୍ୟାଣ ବର୍ଷିଲେ ପୁଅ ବୋହୂ ଆନନ୍ଦ |
ଚାରି ଧାମ ନେଲେ ବୁଲାଇ ପୂର୍ଣ୍ଣ ପିତୃ କାମନା
ଯୋଗ୍ୟ ପିତାଙ୍କର ସୁଯୋଗ୍ୟ ସୁତେ ହେଲା ଗଣନା |
କଳିର ଶ୍ରବଣ କୁମାର ମଧୁ ଉଦାହରଣ
ଦେଉଛନ୍ତି ଆଜି ଜନତା ଉଡ଼େ ଯଶ କେତନ |