ଦୁଇ ଧାର ଲୁହ

ଶରତ ବାବୁଙ୍କ ପତ୍ନୀଙ୍କ ଦେହାନ୍ତ

  କଲେ ଦ୍ଵିତୀୟ ବିବାହ 

ଗରିବ ଘରର ଝିଅ ଶାନ୍ତିଲତା

  ପ୍ରଶାନ୍ତିର ବାରିବାହ |

ବେନିପୁତ୍ରଙ୍କର ପାଳନ ପୋଷଣେ 

  ନିଜ ସୁଖ ବଳି ଦେଇ

ମାତାର ଭୂମିକା ବହି ରୂପାମ୍ବିକା

  ସ୍ୱାମୀଙ୍କ ମନ ରଞ୍ଜେଇ |

ସ୍ୱଇଚ୍ଛାରେ କଲେ ଜନ୍ମ ନିୟନ୍ତ୍ରଣ

  ମାତୃତ୍ୱକୁ ଜଳାଞ୍ଜଳି

ତ୍ୟାଗ ମମତାର ମନ୍ଦିର ସାଜିଲେ

 ବିରାଜିଲେ ଦେଵୀଭଳି |

ମାତୃ ସ୍ନେହ ଦାନେ କରିଲେ ପାଳନ

   ଉଚ୍ଚ ଶିକ୍ଷା ଲଭି ଦୁହେଁ

ସରକାରୀ ଚାକିରୀରେ ଯୋଗଦେଲେ

  ମାଆ ଖୁସି କହିନୁହେଁ |

ଗୋଟିଏ ଦିନରେ ଦୁହିଁଙ୍କ ନିଯୁକ୍ତି

  ଘରୁ ଯେବେ ବାହାରିଲେ

ଆନନ୍ଦେ ମାଆର ଦୁଇଧାର ଅଶ୍ରୁ

  ବହେ ପ୍ଲାଵି ଗଣ୍ଡ ସ୍ଥଳେ |

ଘୋଡ଼ା ଚଢ଼ି ଚାଲି ଗଲା ଖୁସିଦିନ

   ପତି ପରଲୋକ ଗତ

ଅନ୍ତ୍ୟେଷ୍ଟି କ୍ରିୟାର ସମ୍ପାଦନ ଅର୍ଥେ

  ବେନି ଭ୍ରାତ ଉପଗତ |

ବନ୍ଧୁ ବାନ୍ଧବ ତ ଘେନିଲେ ବିଦାୟ

   ପୁତ୍ରେ ବି ହେଲେ ଅନ୍ତର

ଦୁଃଖିନୀ ମାଆର ବେଦନାର ଭାର

   ବଢିଗଲା ଗୁରୁତର |

ସୁମନ ତପନ ତାର ପ୍ରାଣ ଧନ

  ହେଲେ ଏଡ଼େ ଅମଣିଷ

କିପରି ରହିବ ଏକାକୀ ଜନନୀ

  ଶୂନ୍ୟ ଆଜି ଦଶଦିଶ |

ସମବେଦନା ତ ଜଣାଇବା ଦୂର

  ମାଆ ବୋଲି ସମ୍ଭାଷଣ

କଲେ ନାହିଁ କିବା ବିମାତା ଭାବରେ

  ପ୍ରଦର୍ଶାଇ ଆଚରଣ |

ସକଳ ମିହନ୍ତ ତ୍ୟାଗ ପ୍ରତିଦାନ 

   ମାତ୍ର ଦୁଇ ଧାର ଲୁହ

ଫାଟିଯାଏ ଛାତି ହୁଅଇ କରତି

  ଭାଗ୍ୟର ଏ ଚକ୍ରବ୍ୟୁହ୍ୟ |