ଦସ୍ତଖତ

ଗଡ଼ି ଯାଏ ବେଳ ସଂସାର ଜଞ୍ଜାଳ 

  ଧିମେଇ ଯାଏ ଧାରଣା  

ତେଲ ଲୁଣର ଏ ଅଭାବ ସଂସାରେ 

  ବିବେକ ବି ବାଟବଣା। ୧।

କେବେ କଷୁଅଛି କର୍ତ୍ତବ୍ୟର ଅଙ୍କ 

  ସମ୍ପର୍କର ସିଲଟରେ  

ଅହଂ ଅଭିମାନ ଦୁଃଖର ଦହନ 

  କଳ୍ପନା କଳାପଟାରେ। ୨।

ଫର୍ଦ୍ଦ ଫର୍ଦ୍ଦ ପଢେ଼ ପ୍ରତିଟି ପୃଷ୍ଠାରେ 

  ଯନ୍ତ୍ରଣାର ଯତିପାତ 

ସମୟ ଚକରେ ଏ ସଂସାର ରଥ 

  ଗଡ଼ିଯିବ ଏହା ସତ। ୩।

ପରଖିଲି ଯାହା ସବୁ ମିଛ ମାୟା 

  ଜ୍ଜ୍ୱାଳାମୁଖି ଏ ଜଞ୍ଜାଳ  

ତବ ପ୍ରେମ ସ୍ରୋତେ ଭସାଅ ତୁରିତେ 

  ପ୍ରଭୁ ହେ ନୀଳ ଶଇଳ। ୪।

ଶଇଳ ଶିଖର ଅନନ୍ତ ଅପାର 

  ଦୂର କର ଯେତେ କ୍ଷତ  

ମୁକତିର ମାର୍ଗେ ନିଅ ହେ ସରାଗେ 

  ଦେଇ ତୁମ ଦସ୍ତଖତ। ୫।