ଦୋଷୀ ଆମଛଡ଼ା ଆଉ କିଏ ?

ପିଲାଟି ଆମର ବଢିଆ ପଢୁଛି, ଓଡ଼ିଆ ବୁଝେନା ସିଏ,

ଓଡ଼ିଆ ଚଳଣି ଓଡ଼ିଶାର କଥା କିଛି ଜାଣିନାହିଁ ସିଏ |

ଆମ ଇତିହାସ ଗୌରବ ଗାଥା କିଛି ଶୁଣିନାହିଁ ସିଏ,

ମଧୁବାବୁ ବିଜୁ ଗଜପତି ଛବି ଚିହ୍ନି ପାରେନାହିଁ ସିଏ |

ଜଗନ୍ନାଥ ଧାମ ଅବଢା ଖାଇନି ବିରିୟାନୀ ପ୍ରିୟ ସିଏ,

ପୋଡ଼ପିଠା ମଣ୍ଡା ଆରିଷାର ମଜା କେବେ ବି ଚାଖିନି ସିଏ |

ସଜ ପଖାଳର ସୁଆଦ ଜାଣେନା ପିଜା ବରଗର ଖାଏ,

ପରମ୍ପରାକୁ ସେ ହେୟଜ୍ଞାନ କରି କୁସଂସ୍କାର ବୋଲି କହେ |

ଓଡ଼ିଶୀ ନୃତ୍ୟରେ ପାଦ ହଲେନାହିଁ ଓଡ଼ିଶୀ ଶୁଣିନି ସିଏ,

ଆମ ଲୋକକଳା ସହ ପରିଚିତ ହୋଇ ପାରିନାହିଁ ସିଏ |

ଓଡ଼ିଆ ପଢିଲେ ବେକାର ହୋଇବ ସେକଥା ବୁଝିଛି ସିଏ,

ଆମରି ରାଜ୍ୟରେ କିଛି ହେବନାହିଁ ଏବେଠୁଁ କହୁଛି ସିଏ |

ସମ୍ପଦରେ ଭରା ଆମ ଓଡ଼ିଶାକୁ ଗରିବ କହୁଛି ସିଏ,

ଜ୍ଞାନୀ-ମାନୀ-ତ୍ୟାଗୀ ମହାପୁରୁଷଙ୍କୁ ମନେ ରଖିନାହିଁ ସିଏ |

ସଂଗ୍ରାମୀ ରକ୍ତରେ ଓଡ଼ିଶା ଭିଜିଛି ତାକୁ ଦେଖିନାହିଁ ସିଏ,

ସଂସ୍କୃତି ଆମର ପ୍ରାଚୀନ ସମୃଦ୍ଧ ଅନୁଭବୀ ନୁହେଁ ସିଏ |

ଓଡ଼ିଆ ପୁସ୍ତକ ପଢିଦେଲେ କାଳେ ମୂର୍ଖ ହୋଇଯିବ ସିଏ,

ବିଦେଶୀ ଭାଷାକୁ ରଟେ ଦିନରାତି ମନେମନେ ଖୁସି ହୁଏ |

ଆମ ଶିଳ୍ପୀକଳା ଜଗତେ ବିଖ୍ୟାତ ସେକଥା ମାନେନା ସିଏ,

ଅର୍ଥ ଉପାର୍ଜନ ସୁଖଭୋଗ ଖାଲି ଜୀବନର ଲକ୍ଷ୍ୟ କହେ |

ପିତା-ମାତା ଗୁରୁ ଗୁରୁଜନେ କେବେ ପ୍ରଣାମ କରେନା ସିଏ,

ଗୁଡ଼ମର୍ଣ୍ଣିଂ ଗୁଡ଼ନାଇଟରେ କାମଟି ଚଳାଏ ସିଏ |

ବାପା-ମାଆ ଡାକ ଓଠରେ ଆସେନା ଡାଡ଼ି-ମାମି ଡାକେ ସିଏ,

ଚିହ୍ନା-ଅଚିହ୍ନାଙ୍କୁ ସାହି ପଡ଼ିଶାଙ୍କୁ ଅଙ୍କଲ ଡାକୁଛି ସିଏ |

ଏମିତି କାହିଁକି ହେଲା ପଚାରିଲି, ମୋତେ କହିଦେଲା ସିଏ,

ଏଥିପାଇଁ ଦାୟୀ ତମେ ବାପା-ମାଆ, ଆଉ କେହି ଦୋଷୀ ନୁହେଁ |

000