ଦୋଳ ଆସିଛି ଫେରି

ମାଘ ସରିଲା ଫଗୁଣ ହେଲା

ସାଥିରେ ଫଗୁ ଧରି

ବରଷେ ପରେ ଖୁସି ମନରେ

ଦୋଳ ଆସିଛି ଫେରି ।

ଫଗୁଣ ଖରା ଶୁଖିଲା ଧରା

ବହେ ମୃଦୁ ପବନ

ପଳାଶ ଫୁଲ ଫୁଟି ଜଣାଏ

ଦୋଳର ଆଗମନ ।

ଦୋଳରେ ପୁଣି ରାଧିକା ମୁଖେ

କାହ୍ନୁ ଅବିର ବୋଳି

ବିମାନେ ବସି ହୋଇଣ ଖୁସି

ଖେଳିବେ ଦୁହେଁ ଦୋଳି ।

ଗୋପାଳଙ୍କର ଠାକୁର ଘର

ହେଲାଣି ସାଜସଜ୍ଜା

ପ୍ରେମୀଯୁଗଳ କହ୍ନେଇ ରାଧା

ପାଇବେ ଦୋଳେ ପୂଜା ।

ଦେଇ ବସନ ଦ୍ରୈ‌ାପଦୀ ମାନ

ରଖିଲେ ଯେଉଁ ହରି

ସିଏ ଚାହିଁଲେ ଖାଲି ମାଠିଆ

କ୍ଷଣିକେ ଯାଏ ପୂରି ।

ସଜ୍ଜାରେ ସାଙ୍ଗ ସଜ୍ଜା ମୃଦଙ୍ଗ

ସଜ୍ଜା ଖଞ୍ଜଣି ଖୋଳ

ସଜ୍ଜା ବିମାନ ଦୋଳମଣ୍ଡପ

ହେଲା ନିକଟ ଦୋଳ ।

ଦୋଳପୂର୍ଣ୍ଣିମା ରାତିରେ ହେବ

ଗାଁ ମେଲଣ ମୋର

ସଂକୀର୍ତ୍ତନ ଓ ନାଚଗୀତରେ 

ଚଳିବେ ବଂଶୀଧର ।

ପ୍ରକୃତ ଖୁସି ନୁହେଁରେ ଭାଇ

ହାଣ୍ଡିଆ, ମଦ ପିଇ

ତଳେ ଗଡିବା ଜୁଆ ଖେଳିବା

ଗାଁ ମେଲଣେ ଯାଇ ।

ଜାଣିଥା ଚିଣ୍ଟୁ ଜାଣିଥା ଚିଙ୍କି

ଦୋଳ ସରିଲେ ହୋଲି

ସତର୍କ ସହ ଖେଳିବ ରଙ୍ଗ

ସବୁରି ଦୁଃଖ ଭୂଲି ।