ଦିନେ ତୁମେ ଫେରିବ

ମୁଁ ଜାଣେ ତୁମେ ନିଶ୍ଚିତ ଫେରିବ

ନିଜ ଭୁଲ୍ କୁ ମର୍ମେ ମର୍ମେ,

ଅନୁଭବ ବି କରିବ,

କୃତକର୍ମର ପ୍ରାୟଶ୍ଚିତ ନିମନ୍ତେ

ତୁମେ ପୁଣି ଥରେ ଫେରିବ ,

ମୋ ଜୀବନରେ ,

ମୁଁ ଜାଣେ ସାଥିରେ ଆଣିବ 

ଲକ୍ଷେ ଫଗୁଣର ସମ୍ଭାର 

ରଜନୀଗନ୍ଧାର ଫୁଲହାର ,

ଜ୍ୟୋସ୍ନା ବିଧୌତ ରଜନୀ 

ସୁରଞ୍ଜିତ ସୁରାଗିଣୀ,

କିନ୍ତୁ ;

ତୁମେ ଫେରିବ ବୋଲି 

କେତେଦିନ ବା ମୁଁ ଅଟକାଇ ପାରିବି

ଜୀବନର ଶେଷ ନିଃଶ୍ଵାସଟିକକକୁ ,

ତଥାପି ମୁଁ ଦୃଢ ନିଶ୍ଚିତ ଯେ,

ତୁମେ ଫେରିବ ନିଶ୍ଚୟ,

କି ଲାଭ , ପ୍ରିୟ !

ଏ ଅସମୟେ ମିଳୁଛି 

ତୁମର ଏପରି ଫେରିବାର ସଙ୍କେତ ,

କିଏ ଜାଣିଛି !

କ୍ଷତାକ୍ତ ମନ ,

ଆଉ ଶୋକ-ସନ୍ତପ୍ତ ହୃଦୟ ସହ

କେତେଦିନ ବା ମୁଁ କରିପାରିବି !

ତୁମ ଫେରିବାର ପ୍ରତୀକ୍ଷା ।