ଦିନବନ୍ଧୁ ଆହେ

ନିଶ୍ୱାସେ ଯଦି ମୋ ବିଶ୍ବାସ ଭରିନ

ବିଶ୍ଵବନ୍ଧୁ ଆହେ ଭାବଗ୍ରାହୀ,

ଗୀତେ କି ଗାଇଲେ ଗୀତା ଭାଗବତ

କି'ଅବା ଶୁଣିବ କର୍ଣ୍ଣ ଦେଇ ।

ଗୁହାରି କରିନି ଦିନେ ଜଗବନ୍ଧୁ

ଜୁହାରି ତୋହର ପାଦତଳେ,

ପାତକୀ ଟେ ବୋଲି ଭାବୁଛ ଯଦି ହେ

ପତାକା ବାନ୍ଧିଛ କାହିଁ ଛଳେ ।

ଦାସ ପରି ତୁମ୍ଭ ଦାସିଆ ନୁହଁଇ

ଦୂରରେ ରହି ଦେଇନି ଦିନେ,

ମୋତେ ମିଳୁନାହିଁ ଖୁଦ ମୁଠେ କେବେ

ନୋହିବି କେବେ ସୁଦାମା ପଣେ ।

ନୁହେଁ ଦିନବନ୍ଧୁ 'କି' ବନ୍ଧୁ ମହାନ୍ତି

ବନ୍ଧୁ ପଣେ କାହୁଁ ହେବି ସରି,

ମୂକ କରିଅଛ ମୁଖ ଖୋଲୁ ଖୋଲୁ

ଗାଇବି କି' ସାଲବେଗ ପରି ।

ଅଦେଖା ଅଚିହ୍ନା ବୋଲି ଯେବେ ପର

ଭାବେ ମୋତେ ପର କରିଥାଅ,

ଅନ୍ତର୍ଯ୍ୟାମୀ ନାମ ବହି ଅଛ ପ୍ରଭୂ

ହୃଦ ଅନ୍ତର୍ଗତେ ପରା ରୁହ ।

'ନ' ଦିଅ ଠାକୁରେ ବଡ଼ଦାଣ୍ଡୁ ହାତେ 

ଅବା ଜାଗା କିଛି ସ୍ଵର୍ଗଦ୍ଵାରେ, 

ଅନ୍ତର୍ଯ୍ୟାମୀ ଅନ୍ତଃ ବାରତା ମୋ ଶୁଣି 

ଅନ୍ତର ନୋହିବ ଅନ୍ତକାଳେ ।