"ଦୀପାଳି"ର ଆଲୋକରେ

ଝିଲିମିଲି ଦୀପ ରେ ସଜ୍ଜିତ ପର୍ବ

ଭାରତୀୟ ସଂସ୍କୃତିର ଗର୍ବ ଗୌରବ

ହର୍ଷ ଉଲ୍ଲାସ ନବ ପ୍ରକାଶେ ମନ

ଦୀପ ଜ୍ୟୋତି ଆକାଶକୁ ଆଲିଙ୍ଗନ

ଆଲୋକ ଚାଦର ଘୋଡ଼ି ହୋଇ ଧରା

ପ୍ରତିକ୍ଷଣ କିଛି କରୁଛି ଇଶାରା

ନୂଆ ଆଶା ନୂଆ ଭାବନା ପ୍ରେରଣା

ନୂଆ ଉଦ୍ୟମର ପ୍ରାରମ୍ଭ ସୂଚନା

ସଭିଙ୍କୁ ଏକ ଡୋରୀରେ ବାନ୍ଧି ନେଇ

ଭାଇଚାରା ପର୍ବ "ଦୀପାବଳୀ" ଏହି

ଉତ୍ସାହ ସହିତ ହେବା ଅଗ୍ରସର

ଆସ ନୂତନ ପଥ ବାଛିବା ସତ୍ତ୍ଵର ।

ମନରେ ଛଳ ଦମ୍ଭ ମିଥ୍ୟା ଅନ୍ଧାର

ଚାରିଆଡେ ବ୍ୟାପି ଅଛି ଭ୍ରଷ୍ଟାଚାର

ଦୁର୍ନୀତିରେ ଏ  ସମାଜ କଳୁଷିତ 

ଶତ୍ରୁତା ମନୋଭାବ ହୃଦେ ଜଡ଼ିତ

ଘର ବାହାର ଆଲୋକରେ ସଜ୍ଜିତ

"ଦୀପାବଳୀ"ହେଉ ଉତ୍ସାହ ସହିତ

ଏ ମହାନ ଉତ୍ସବ ହେଉ ପାଳନ

ଅଜ୍ଞତା ଅନ୍ଧକାର ହେଉ ବର୍ଜ୍ଜନ

କେମିତି ଘୁଞ୍ଚିବ ମନ ଅନ୍ଧକାର

ମନରେ ପ୍ରଶ୍ନ ଉଠୁଛି ବାରମ୍ବାର ।

ହାୟ,"ଦୀପାବଳୀ" ପୁଣି ଆସିଅଛି

ମହଙ୍ଗା ଦରବୃଦ୍ଧି ବ୍ୟାପି ରହିଛି

ବଜାରରେ ଶୁନ୍ୟତାର ପ୍ରତିଧ୍ଵନି

କିପରି ପର୍ବ ହେବ,ବୁଝି ହେଉନି

"ଦୀପାଳି"ପାଇଁ ସଫା ଘର ଭିତର

ଅଳିଆରେ ଭର୍ତ୍ତି ବଜାର ସହର

କି ପ୍ରକାର ପରିଷ୍କାର ପରିଚ୍ଛନ୍ନ

ଭାବନାରେ ପ୍ରଦୂଷଣ ପରିପୂର୍ଣ୍ଣ ।

ମା କାଳୀଙ୍କ ଆରାଧନା ଦୀପାଳି ରେ

ମନର ଅନ୍ଧାର ଘୁଞ୍ଚୁ ଆଲୋକରେ

ପରିବେଶ ନଷ୍ଟ ନ ହେଉ ବାଣରେ

ପିତୃଗଣ ଯାତ୍ରା ହେଉ ଆଲୋକରେ

ନୂଆ ସୃଷ୍ଟି ହେଉ ଏ ଶୁଭ ବେଳରେ

ହର୍ଷ ଉଲ୍ଲାସର ପର୍ବ "ଦୀପାଳି" ରେ ।