ଦୀପାବଳିର ବିଧି ବିଧାନ

ଆଜି ଦୀପାବଳି  ବିଧି ବିଧାନ

ଆଲୋକେ ସଜାଇ ଗୃହ ତୋରଣ ।

ହିନ୍ଦୁ ପରମ୍ପରା   ଦେଇ ସମ୍ମାନ

ପୂର୍ବ ପୁରୁଷଙ୍କ    ଯିବା ଶରଣ ।

ଘର ଲିପପୋଛା  ସକାଳୁ କରି

ସୁସ୍ୱାଦୁ ଭୋଜନ  ରନ୍ଧନ ସାରି ।

ପିଠା ପଣା ପୁଣି କେତେ ଦରବ

ପୂର୍ବ ପୁରୁଷଙ୍କୁ   ସମର୍ପି ଦେବ ।

କାଉଁରିଆ କାଠି ହୁଅଇ ଲୋଡା

ଏକୋଇଶି  ଖଣ୍ଡେ ହୁଅଇ ବିଡା ।

ନଈ ଲଟି ପୁଣି   ଚିମିରି ଲଟି

ଦଣ୍ଡା ବାଳୁଙ୍ଗା ଯେ ଥିବ ସାଥେଟି ।

ଆଖୁ ଗଜ ଖଣ୍ଡେ  ସଂଗ୍ରହ କରି

ଗଳି ଗୁଆ ଦେବା ତା ମଧ୍ୟେ ଭରି ।

କାଂଶିରେ କରିବ  ଆଳତି କାଠି

ଗୁଆ ଘିଏ ସଜ   ଦୀପ ବଇଠି ।

ପୂର୍ଣ୍ଣ କୁମ୍ଭଟିଏ  ପାଶେ ବସାଇ

ପଞ୍ଚ ମୁରୁଜକୁ  ଦେବ ବିଛାଇ ।

ସଞ୍ଜ ବେଳେ ନାନା ଭୋଗ ବାଢିବ

ବଡ଼ବଡୁଆଙ୍କୁ   ସମର୍ପି ଦେବ ।

କାଉଁରିଆ କାଠି ନିଆଁରେ ଜାଳି

ଇଶାଣରେ ଆଗ ଦେବ ଅଞ୍ଜଳି ।

ସବୁ ସଦସ୍ୟ ଯେ ଏକାଠି ହୋଇ

ଦାଣ୍ଡରେ ଡାକିବ କାଠି ଦେଖେଇ ।

ବଡ଼ବଡୁଆ ହୋ ଅନ୍ଧାରେ ଆସି

ଆଲୋକରେ ଯାଅ ହୋଇଣ ଖୁସି ।

ସନ୍ଧ୍ୟାରେ ସରିବ  ବିଧି ବିଧାନ

ବିଲୁଆ ଡାକକୁ  ନ ଦେବ ସ୍ଥାନ ।